Shqiptarët, më shumë shanse për të fituar per Green Card

[Altin111]

Shqiptarët, më shumë shanse për të fituar per Green Card

Departamenti amerikan, përgjegjës për çështjet e emigracionit, bëri të ditur se mënyra e kuotëzimit të fituesve në bazë të vendeve pjesëmarrëse do të bazohet në kuotat që ka pasur “Green Card”.

Shqiptarët duket se janë të favorizuar nga një vendim i tillë, pasi në tre vitet e fundit kanë qenë në 10 vendet e para të fituesve të lotarisë amerikane. Vlen të theksohet se ndërkohë që fituesit do të jenë punonjës të kualifikuar, vendimi për pranimin e tyre do të bazohet edhe nga vendi i origjinës.

Pjesëmarrësit e “Green Card”

Në lotarinë më të përhapur në botë, pra në “Green Card”, marrin pjesë pothuajse të gjitha vendet e botës, me përjashtime që bëhen herë pas here. Këtë vit, nga Evropa nuk do të kenë të drejtë të aplikojnë qytetarët e Mbretërisë së Bashkuar, me përjashtim të Irlandës së Veriut, pasi qeveria amerikane e ka cilësuar të panevojshme që këta qytetarë të konkurrojnë.

Për më tepër, as rusët dhe polakët nuk do të mund të aplikojnë, me arsyetimin se në Shtetet e Bashkuara, popullsitë që kanë origjinën nga këto dy vende janë në masë të madhe. Lotaria “Green Card” ka filluar që prej vitit 1996 në të gjitha vendet e botës dhe është pjesë e strategjisë së Shteteve të Bashkuara të Amerikës, për të thithur fuqi të re punëtore dhe intelektuale në kontinentin përtej Atlantikut.

Në vitin 2006, shqiptarët të 9-t në “Green Card”

Gjatë vitit të kaluar, shqiptarët duket se kanë qenë mjaft të privilegjuar nga lotaria në fjalë. Plot 2.504 bashkatdhetarët tanë kanë fituar tashmë të drejtën për të shkuar përtej Atlantikut vitin e ardhshëm, duke e renditur vendin tonë në radhën e nëntë të shteteve me më shumë të pranuar në lotarinë amerikane.

Në vend të parë, pra më të privilegjuarit duket se kanë qenë etiopianët, me 6.995 aplikime të pranuara, të pasuara nga dy vende të tjera afrikane, Egjipti dhe Maroku, me 6.439 dhe 5.980 “Green Card”-e të aprovuara. Vlen të theksohet se vendi ynë ishte në vend të tretë në Evropë në lotarinë e këtij viti, pas Ukrainës dhe Polonisë.

Ndërkohë që një vit më parë, me anë të lotarisë në fjalë janë pranuar 1.896 persona, të cilët këtë vit do të nisen drejt Shteteve të Bashkuara, çka e solli vendin tonë në 30 shtetet me më shumë aplikime të aprovuara për “Green Card”.



Pikët siç janë në Kanada, nga pritet të bazohet edhe sistemi amerikan



Edukimi

Doktoraturë ose master dhe 17 vjet studimi 25

Diplomë trevjeçare dhe 15 vjet studimi 22

Diplomë dyvjeçare dhe 14 vjet studimi 20

Diplomë njëvjeçare dhe 13 vjet studimi 15

Diplomë njëvjeçare dhe 12 vjet shkollim 12

Shkollë e mesme 0



Gjuha

Anglisht Të folurit Të shkruarit Të dëgjuarit Të lexuarit

Mirë 3 pikë 3 pikë 3 pikë 3 pikë

Mesatar 2 pikë 2 pikë 2 pikë 2 pikë

Bazik 1 pikë 1 pikë 1 pikë 1 pikë



Përvoja e punës

4 vjet 21 pikë

3 vjet 19 pikë

2 vjet 17 pikë

1 vit 15 pikë



Mosha

17 2 pikë

18 4 pikë

19 6 pikë

20 8 pikë

21-49 10 pikë

50 8 pikë

51 6 pikë

52 4 pikë

53 2 pikë



SHBA, prezantohet sistemi i pikëve që do të zëvendësojë “Green Card”



Sistemi i pikëve për çdo fushë, i përafërt me Kanadanë

Si do të jetë sistemi i pikëve dhe si mund të fitoni



Ardit Bido

arditbido@journalist.com



Shtetet e Bashkuara të Amerikës kanë prezantuar dje sistemin e ri të pikëve, që do të zëvendësojë gradualisht lotarinë “Green Card”, për vizë emigracioni në SHBA. Sistemi i ri, i bazuar kryesisht mbi sistemin kanadez, do të fillojë të zbatohet në vitin 2012 dhe do të jetë i vetmi sistem në vitin 2015, që do të furnizojë tregun dhe shoqërinë amerikane me punonjës të rinj.

Sistemi i ri i aplikimit për të marrë një vizë dhe për të punuar në vendin amerikanoverior është i bazuar në një sistem kompleks pikësh. Pyetësori në total ka 100 pikë dhe aplikanti për të emigruar apo për të marrë një vizë duhet të grumbullojë të paktën 70 pikë, për të vijuar në fazën e dytë, në ndryshim nga SHBA-ja, ku kriteri është 67 pikë. Ky është edhe ndryshimi më i dukshëm me sistemin kanadez, së bashku me gjuhën frënge që në SHBA nuk është ndër kërkesat. Në vetvete pyetësori ndahet në disa pyetje, mbi shkollimin, njohjen e anglishtes, përvojën e punës, mosha, marrëveshja e punësimit dhe detyrimet e tjera.

SHBA-ja ka paraqitur përpara dy ditësh sistemin e ri të aplikimit për të marrë një vizë dhe për të punuar në vendin amerikanoverior, i cili është i bazuar në një sistem kompleks pikësh. Në pyetësorin që u jepet të gjithë aplikantëve për të shkuar në SHBA janë të përcaktuara në mënyrë të detajuar të gjitha fushat që duhet të përgjigjen, duke përmbajtur secila një numër të caktuar pikësh.

Pyetësori në total ka 100 pikë dhe aplikanti për të emigruar apo për të marrë një vizë duhet të grumbullojë të paktën 70 pikë, për të vijuar në fazën e dytë. Aplikantët skualifikohen automatikisht në rast se janë dënuar në vendin e origjinës, ose në rast se kanë probleme shëndetësore.

Mosha

Për të jetuar në SHBA preferohen ata kryefamiljarë apo kryefamiljare, që janë ndërmjet 21 dhe 49 vjeç. Për këtë grupmoshë jepet maksimumi i pikëve ekzistuese, që janë dhjetë pikë. Për më të vegjlit se 16 vjeç dhe për personat që i kanë mbushur 54 vjeç nuk akordohet asnjë pikë.

17-vjeçarët marrin dy pikë nga ky seksion i pyetësorit, pikë këto që shtohen me nga dy deri në moshën 21-vjeçare, ku jepen pikët maksimale. Nga ana tjetër, 50-vjeçarët përfitojnë 8 pikë, të cilat ulen me nga dy për çdo vit, deri në 54 vjeç, ku nuk përfitohet asnjë pikë. Edhe ky seksion është i njëjtë me atë të Kanadasë.

Përvoja e punës

Përvoja e punës përbën një përparësi për aplikimin për emigrim apo vizë në SHBA. Në total nga kjo ndarje mund të përfitohen 21 pikë. Nëse aplikanti ka 4 vjet punësimi e më shumë, atëherë ai merr maksimumin e pikëve, ndërkohë që nëse ka më pak se një vit pune, atëherë ai nuk merr asnjë pikë.

Për një vit pune, aplikantit i jepen 15 pikë, për dy vite ai grumbullon 17 pikë dhe për tre vjet punësimi në sektorin privat apo publik të vendit të tij të origjinës, ai përfiton 19 pikë.

Edukimi

Nga 100 pikët e pyetësorit, 25 pikë kanë të bëjnë me edukimin dhe kjo tregon rëndësinë që i jepet atij. Pikët maksimale mund të fitohen vetëm nëse aplikanti ka një doktoraturë ose një master, të shoqëruara këto diploma me 17 vjet studimi. Ndërkohë që nëse studenti ka një diplomë tre ose më shumëvjeçare dhe 15 vjet studimi, atëherë ai merr 22 pikë. Për diplomat me vlerë më të ulët akademike aplikanti përfiton 20, 15 përkatësisht për një diplomë ose një certifikatë dyvjeçare të shoqëruar me shkollim 14-vjeçar dhe 13 vjet studimi, prej nga të cilat aplikanti ka përfituar një diplomë njëvjeçare ose certifikatë. Ndërkohë që 12 pikë akordohen atëherë kur aplikanti ka marrë një diplomë ose certifikatë njëvjeçare dhe ka studiuar në total 12 vjet. Për kategoritë e tjera nuk jepet asnjë pikë. Kjo pjesë është tërësisht e njëjtë me sistemin kanadez, dhe duket se mund të krijojë një treg të përbashkët emigrimi mes dy vendeve të Amerikës së Veriut.

Gjuha

Për të vijuar jetën në SHBA normalisht, aplikantëve për emigrantë u kërkohet nëse dinë apo jo gjuhën “de facto” zyrtare të këtij vendi, anglishten. Pikët që merren nga ky seksion i pyetësorit janë 24 në total. Ky është edhe ndryshimi i dytë me Kanadanë. Pasi në vendin fqinj të SHBA-së i jepet më shumë përparësi njërës nga dy gjuhët zyrtare, anglishtes dhe frëngjishtes.

Kjo gjuhë, të cilën aplikanti e zgjedhë vetë në Kanada, sipas aftësive që ka për të komunikuar me të, ka 14 pikë, ndërkohë që gjuha tjetër ka 8 pikë. Në të dyja vendet, pyetësori është i ndarë në 8 pyetje me nga tri pikë.

Pyetjet kanë të bëjnë me aftësinë në të folurin, në të shkruarin, në të dëgjuarin dhe në të lexuarin. Për çdo nga këto tetë pyetje janë katër alternativa: nuk e di, ku aplikanti merr 0 pikë, njohuri bazike me 1 pikë, njohuri mesatare me 2 pikë dhe njohuri e mirë me 3 pikë.

Kërkesat e tjera

Për të marrë vizën e emigrimit drejt SHBA-së, qytetarët shqiptarë, ashtu sikurse edhe qytetarët e tjerë, do të përfitojnë edhe 10 pikë të tjera nëse do të kenë një ofertë pune nga SHBA-ja, e cila duhet të jetë e regjistruar në zyrat e punësimit të vendit amerikanoverior. Ndërsa për sa u përket 10 pikëve të fundit të pyetësorit, ato kanë të bëjnë me shoqëruesin e aplikantit, i cili mund të jetë një nga prindërit, ose bashkëshorti apo bashkëshortja.

Kjo pjesë e pyetësorit ka katër elemente me nga pesë pikë, por në çdo rast nga kjo pjesë aplikanti mund të grumbullojë jo më shumë se dhjetë pikë. Në këtë mënyrë, edhe pse ai mund të marrë të njëzetë pikët e mundshme, llogaritja që do t’i bëhet aplikimit, do t’i vlerësojë këto pikë si dhjetë. Nëse bashkëshorti apo bashkëshortja kanë përfunduar një master apo doktoraturë, atëherë listës së pikëve i shtohen edhe pesë të tjera. Ndërkohë që me diplomë trevjeçare përfitohen 4 pikë. Një diplomë dyvjeçare vlen dy pikë dhe një diplomë apo certifikatë njëvjeçare llogaritet me një pikë. Nëse në SHBA ndodhet një i afërm i aplikantit apo bashkëshortit/bashkëshortes së tij, atëherë shtohen edhe pesë pikë. Për aplikantët që kanë përfunduar studimet e larta në SHBA apo kanë punuar për të paktën një vit, janë rezervuar edhe nga pesë pikë të tjera.

Sistemi i ri do të hyjë në përdorim brenda vitit 2012 dhe detajet e tij do të bëhen publike vitin e ardhshëm.


05/12/2007 *