Lëvizja e qytetarëve në Maqedoni, si më parë

[Altin111]

“Lëvizja e qytetarëve për në Maqedoni do të vazhdojë të behet në të njëjtën mënyrë, siç ka qenë më parë". Lajmi është bërë i ditur një ditë më parë nga Zyra e Shtypit pranë Drejtorisë së Përgjithshme të Policisë së Shtetit. Kështu, në lidhje me çështjen e rregullimit të regjimit të lëvizjes së qytetarëve me Maqedoninë, dhe deklarimet e bëra në media, se ky regjim do të ndryshojë në datën 1 shkurt, Drejtoria e Përgjithshme e Policisë së Shtetit ka bërë të ditur se "nuk ka asnjë njoftim zyrtar për ndryshimin e regjimit të lëvizjes së qytetarëve në drejtim të Maqedonisë". Ndërkohë, për çështjen e regjimit të vizave me Shqipërinë, qëndrime kontradiktore duket se kanë ardhur dhe nga Shkupi zyrtar. Pa u mbushur as 24 orë nga deklarata e zëdhënësit të qeverisë maqedonase, Ivica Bocevski për tërheqjen nga këto procedura deri në gjetjen e zgjidhjeve të reja, Ministria e Jashtme maqedonase vijon të deklarojë se aplikimi i regjimit të vizave për shtetasit shqiptarë nuk ka kthim prapa. Nëpërmjet zëdhënësit Sasho Kokallanov diplomacia maqedonase pretendoi sërish dy ditë më parë se procedura e aplikimi për vizë në ambasadë, jo vetëm është konform rekomandimeve të Bashkimit Evropian, por dhe se nuk pengon udhëtimin e shtetasve shqiptare drejt Maqedonisë. Qëllimi është që të implementohen standardet evropiane në këtë fushë. Maqedonia si vend kandidat për anëtarësim në NATO ka marrë disa rekomandime nga KE-ja.