Grabitja e pikturave, dyshohen tre shqiptarë

[kuklla]

Kompanitëangleze të sigurimeve hedhin dyshimet tek një bandë shqiptarësh. Mediat zvicerane: Janë sllavë

Grabitja e katër tablove të piktorëve impresionistë tre ditë më parë në Zvicër dyshohet se është bërë nga tre shqiptarë. E konsideruar si nga grabitjet më të mëdha të veprave të artit në Europë, vjedhja e pikturave me vlerë 163.2 milionë dollarë amerikanë, ka mbetur ende e pazbardhur nga policia lokale. Ka qenë një gazetë angleze, e cila i referohet burimeve nga Londra, ajo që hedh dyshimet për një grup shqiptarësh. Nga ana tjetër, mediat zvicerane insistojnë se grabitësit janë shtetas nga ish- Jugosllavia. Ajo në të cilën bien dakord të dyja palët është se grabitësit e pikturave janë ballkanas.

Sipas burimeve të mirinformuara nga kompanitë e sigurimeve në Londër, grabitja e pikturave të Monet, Degas, Van Gogh dhe Cezanne nga muzeu "Emil Buhrle Foundation" në Zyrih ka për autorë tre kriminelë shqiptarë. Ata kanë hyrë në muze të maskuar e me armë në dorë dhe kanë mundur që të largohen prej aty me katër tablotë impresioniste. Arratisja e tyre është bërë me një makinë të bardhë ndërsa pikturat ishin gati duke rënë përdhe teksa makina ecte me një shpejtësi marramendëse. Burimet nga kompanitë e sigurimeve kanë theksuar dje se muzeu ka qenë i mbushur me punonjës sigurie por asnjë prej tyre nuk ka arritur që të veprojë për të mbrojtur pikturat. Hetuesit kanë shpjeguar se katër pikturat e grabitura ishin vendosur së bashku në të njëjtin mur ndërsa vepra të tjera, edhe më të vlefshme se ato, ndodheshin në muret e tjera të sallonit. "Ata kanë grabitur çfarë u ka dalë përpara dhe si përfundim kanë marrë vetëm katër pikturat e para. Kjo do të thotë se grabitësit nuk kanë pasur njohuri për pikturat që ndodheshin aty dhe se grabitja nuk ka qenë e porositur nga ndonjë koleksionist arti ilegal pasi ai do të kishte urdhëruar zgjedhjen e pikturave më të vlefshme",- thanë burimet nga kompanitë e sigurimeve. Ato shtuan se pikturat ishin të siguruara për vlera që variojnë nga 50 deri në 80 milionë paund, pra më shumë se dyfishin e tyre. Një nga hetuesit më të mirë të grabitjeve të veprave të artit në Londër ka pohuar dje se nëse pikturat e vjedhura nuk gjenden brenda javës së parë, atëherë ka shumë pak shanse që të gjenden. "Piktura të këtij kualiteti dhe fame janë të vështira që të shiten haptazi. Shpesh herë grabitësit mendojnë se do të gjejnë treg mes koleksionistëve privatë e të pasur por kjo është një legjendë pasi asnjë koleksionist nuk do të blinte piktura nga grabitësit që nuk i njeh",- ka pohuar dje për mediat britanike një prej hetuesve të kompanisë së sigurimeve.