Panik në rrugë, tërhiqet zvarrë 4-vjeçari

[kuklla]

Artur Korriku

DURRES -Një fëmijë 4 vjeç është tërhequr për gati 30 metra zvarrë, si pasojë e një aksidenti të ndodhur dy ditë më parë në Durrës. Ndërkaq, aksidenti ka shokuar kalimtarët, të cilët kanë parë skenën e tmerrshme. Mësohet se fëmija është në gjendje të rëndë dhe mjekët ende nuk kanë dhënë shpresa për jetën e tij. Policia tha se shkak për këtë aksident të rëndë, është bërë shkelja e rregullave të qarkullimit rrugor nga ana e drejtuesit të mjetit.
AKSIDENTI
Shkak për këtë situatë është bërë mungesa e vendosjes së pengesave rrugore, ose siç njihen ndryshe, e "policëve të fjetur" përgjatë kësaj rruge, e cila përshkon një lagje të populluar ndjeshëm gjatë viteve të fundit e për më tepër, kur atje gjenden edhe Universiteti Publik "Aleksandër Moisiu" dhe shkolla 9- vjeçare "Vicens Prenushi". Të dielën në mbrëmje, kalimtarët e kësaj rruge janë tmerruar teksa kanë parë me sytë e tyre një aksident automobilistik, pasojë e të cilit ka qenë plagosja e rëndë e fëmijës 4-vjeçar D.S., lindur e banues në Tiranë. Rreth orës 18:00, fëmija kishte dalë nga kontrolli i prindërve dhe kishte zbritur në rrugë. Në këtë moment, ai është marrë zvarrë për 30 metra nga automjeti tip "Ford" me targë DR 9981 D, i cili drejtohej nga 20-vjeçari Pedi Cenosina, lindur e banues në qytetin e Durrësit. Fëmija është dërguar urgjentisht në Spitalin Ushtarak të Tiranës dhe ndodhet në gjendje shumë të rëndë. Ai kishte ardhur në Durrës së bashku me prindërit, për të kaluar disa orë pranë bregut të detit në Durrës. Policia ka arrestuar 20- vjetarin, me akuzën e "shkeljes së rregullave të qarkullimit rrugor", si dhe ka bllokuar automjetin e tij.
RRUGA
Rruga Currila-Torra Veneciane është bërë tejet e rrezikshme, për shkak se mjetet lëvizin me shpejtësi tepër të madhe. Ndërkohë që e gjithë gjatësia e këtij aksi nuk ka asnjë pengesë për të minimizuar shpejtësinë, të paktën në zonat më shumë të populluara. Dy ditë më parë, një aksident i rëndë ndodhi duke marrë zvarrë një fëmijë 4 vjeç, jeta e të cilit është në fije të perit. Por rruga është kthyer në një makth nga ana e këmbësorëve, jeta e të cilëve është kurdoherë në rrezik, për shkak se drejtuesit e automjeteve lëvizin me shpejtësi të madhe. Dy persona të vdekur dhe 5 të plagosur, është bilanci i aksidenteve rrugore në këtë aks brenda harkut kohor të 2 muajve të fundit, pa llogaritur aksidentet që fatmirësisht janë konsideruar si të lehta, të cilat kanë qenë me dhjetëra.
PENGESAT
Vetëm pak javë më parë, në këtë rrugë humbi jetën edhe një 20- vjeçar po për të njëjtat shkaqe. Qytetarët e Durrësit, me të drejtë janë ankuar dhe kërkojnë marrjen e masave për të evituar aksidentet automobilistike. Për këtë problem, kreu i Bashkisë së Durrësit, Vangjush Dako tha se "në bashkëpunim me Policinë Rrugore do të përcaktojmë vendet se ku do të vendosim "policët e fjetur", dhe për këtë qëllim kemi parashikuar një fond, i cili do të futet për miratim në mbledhjen e sotme të Këshillit Bashkiak".Ndërsa shefi i Qarkullimit Rrugor, Xhemal Lusha sqaron se vetëm në këto dy muaj, në këtë rrugë janë gjobitur 135 drejtues automjetesh. "Kemi bllokuar 12 palë dokumente automjetesh dhe kemi penalizuar disa dhjetëra drejtues, të cilëve iu kemi hequr të drejtën e drejtimit të automjeteve për një periudhë nga 1 deri në 6 muaj", - tha shefi i Qar-kullimit në Durrës.