Vitamina D aleat kundër infarktit dhe iktusit

[ema_d]

Zemra është në rrezik nëse mungon vitamina D.

Të paktën ky është konkluzioni i një studimi të kryer nga Thomas J. Wang dhe kolegët e tij të "Harvard Medical School", të cilët kanë marrë në studim lidhjen që ekziston mes mungesës së vitaminës D dhe shfaqjes së infarktit dhe iktusit te rreth 1.739 persona, me moshë mesatare 59 vjeç. Në fillim të studimit, personat nuk kishin shfaqur asnjë simptomë shqetësimesh kardiovaskulare dhe kanë lejuar t'u matej niveli i vitaminës D në gjak. Nga këto analiza ka rezultuar se 28% e tyre shfaqnin mungesë të theksuar të kësaj vitamine. Gjatë periudhës 5-vjeçare, që ka zgjatur studimi, 120 persona kanë pësuar atak kardiak, iktus apo një shqetësim tjetër kardiovaskular. Shkencëtarët e Bostonit, në këtë pikë, kanë zbuluar se incidenca e këtij tip-problemi ishte më e lartë mes atyre që shfaqnin nivele të ulëta vitaminë D. Duke mbajtur parasysh faktorë-kyçë për shfaqjen e sëmundjeve kardiovaskulare si: mosha, seksi dhe elementë të tjerë, shkencëtarët amerikanë kanë arritur në përfundimin se nivelet e ulëta të vitaminës D (jo më të larta se 15 nanogramë për mililitër) bëjnë të mundur se rreziku për të pasur probleme kardiake mund të dyfishohet. Një shtim i riskut që ka rezultuar mjaft i dukshëm te personat që vuanin nga hipertensioni. Wang ka cituar në revistën zyrtare të "American Heart Association", se kjo s'është gjë tjetër veçse një konfirmim e një teori që hidhet shpesh në revista të shumta shkencore që janë kryer gjatë viteve. Por ajo që duhet të verifikohet ende, është fakti nëse përbërësit e vitaminës D te personat duhet të përbëjë një strategji efikase në parandalimin e problemeve kardiovaskulare. Vitamina D gjendet në disa ushqime si vaji i peshkut dhe vezës, por dielli është burimi kryesor i kësaj vitamine të çmuar: në fakt rrezet e diellit stimulojnë organizmin ta prodhojë këtë vitaminë në mënyrë autonome. Sipas studiuesve, receptorët e vitaminës D gjenden në muskulin kardiak dhe në muret e enëve të gjakut: kjo do të shpjegonte se përse nivelet e ulëta të vitaminës D mund të komprometojnë shëndetin kardiovaskular.