Mbipesha shkaku i Tragjedise

[ReniX]

Ekspertiza paraprake e tragjedise se Farkes: Nëse do të kishte munguar izolimi i motobarkës, do të kishte më pak viktima

TIRANË – Konkluzionet paraparake të ekspertizës së motobarkës së tragjedisë së Farkës, dëshmojnë se jetët e 16 personave u shuan nga mbipesha dhe mbi të gjitha nga lëvizja e njëkohshme në njërin krah e pothuajse të gjithë personave që ishin mbi motobarkën nën pronësi të Afrim Dibrës. Ndërkohë që po nga e njëjta ekspertizë u konstatua se mjeti lundrues ishte në gjendje të mirë teknike dhe se ajo nuk fuste ujë nga jashtë brenda, siç u dyshua në fillim se mund të kishte ndodhur. Sipas burimeve konfidenciale të gazetës “Korrieri”, mësohet se pas nxjerrjes në sipërfaqe të motobarkës së vdekjes, u pa se ajo ishte e izoluar krejtësisht në të gjitha anët dhe se nëse ajo do të kishte qenë e hapur, siç ishte motobarka tjetër me të cilën transportoheshin klientët nga bregu drejt bar-restorant “Liqenit”, ka shumë të ngjarë që pasojat e përmbytjes së mjetit të vogël lundrues të ishin shumë më të vogla, sesa ishin realisht në tragjedinë e pak ditëve më parë në Farkë. Fillimisht motobarkës mësohet se i është bërë një këqyerje paraprake nga jashtë dhe se ajo ka qenë kryesisht material plastik, çka ka çuar hetuesit të diskutojnë pistën se nëse nuk do të kishte pasur mbipeshë në bord, ai lloj materiali do të ishte e vështirë që të mbytej. Por ajo çka rezulton fatale paraprakisht është izolimi i bërë me picikllas motobarkës. Ky lloj izolimi nuk ka lejuar 16 personat që mbetën në kurthin e motobarkës që të lëviznin dhe të mund të notonin drejt sipërfaqes. Që nga dita e sotme e në vazhdim, pritet që mjeti lundrues i tragjedisë së Farkës t’i nënshtrohet një ekspertize më të plotë, çka do të thotë, jo vetëm ekspertë kriminalistikë të policisë, por dhe ekspertë të fushës së ndërtimit të mjeteve lundruese dhe të tjerë ekspertë të cilët do të kryejnë eksperimentet e duhura për të arritur në konkluzionin përfundimtar në lidhje me tragjedinë e Farkës. Përmasat e tragjedisë më të fundit, e cila është një ndër më të mëdhatë përsa i përket numrit të viktimave të ndodhura gjatë viteve të fundit në vendin tonë, duket se kanë qenë jo pak përcaktuese dhe në seriozitetin e hetimit të kësaj ngjarje. Burimet policore ishin dje të rezervuara në dhënien e më shumë detajeve rreth asaj çka ata kanë hetuar deri më tani, në lidhje me tragjedinë e 6 marsit, ku humbën jetën 16 persona, 8 prej të cilëve pjesëtarë të familjeve Osmani dhe 5 të tjerë anëtarë të familjeve Hysa e Spahiu, të cilat ishin me lidhje të afërme gjaku mes tyre. Nga tragjedia arritën të shpëtonin vetëm 3 persona, Beqir Sinani, Romina Hysa dhe Luena Spahiu.
Material nga Gazeta korrieri