“Të eksportohen filmat shqiptarë”

[kuklla]

14/03/2008 - 12:00
• Oliverta Lila

Realiteti shqiptar i duket interesant dhe frymëzues për tema kinematografike. Nga vëzhgimet e para, talentet nuk mungojnë, por duhet një vullnet politik për të investuar më shumë drejt kinematografisë. Ndërsa koproduksionet dhe eksportimin e filmave shqiptarë jashtë, e sheh si rrugën më të mirë të zhvillimit kinematografik. Stefano Porru është producenti italian që ka mbërritur në Tiranë bashkë me aktorin e njohur, Michele Placido. Ftesa për premierën e dytë të filmit “Trishtimi i Zonjës Shnajder” të regjisorëve Pirro dhe Eno Milkani, i ka shërbyer për të vëzhguar hapësirat e mundshme të bashkëpunimit. Këtë fakt e vuri në dukje edhe aktori popullor për publikun shqiptar, Michele Placido. Që në fillim të vizitës së tij, ai deklaroi mundësinë e një projekti filmik në të ardhmen. Aktualisht, Stefano Porru është producenti që po bashkëpunon në filmin më të fundit të Placido, “Ëndrra e madhe”, ku ai ka marrë përsipër regjinë. “Po punojmë për prodhimin e ri të filmit të Michele Placido. Flitet për protestat e studentëve të vitit 1968 dhe gjithçka është përshtatur brenda një viti. Është një punë mjaft impenjative”, -thekson Po-rru. Dy ditët e qëndrimit në Tiranë i kanë mjaftuar vetëm për të kuptuar realitetin kinematografik dhe për piketime bashkëpunimi. “Realiteti shqiptar është shumë interesant. Këtu ka pak salla kinemaje dhe një publik i vogël në numër, por ky realitet duhet të zhvillohet. Duhet tentuar të prodhojnë më shumë filma dhe të kërkojnë t’i eksportojnë në vende të huaja, të kenë bashkëpunime me jashtë dhe koproduksione. Këto vende mund të jenë Italia, Franca, Gjermania etj, ku ka më shumë salla dhe një publik të madh në numër. Sipas meje, kjo është rruga më interesante dhe për këtë duhet një vullnet politik i qeverisë shqiptare për t’i dhënë një dorë më shumë filmit. Qoftë edhe me realizimin e një filmi më shumë për çdo vit”, - shprehet Porru. Sipas tij, që në fillim duhet të ngrihen projekte me pikësynimin për distribucion të huaj. Producenti e sheh rolin e qeverisë shqiptare në këto koproduksione si të një sipërmarrësi që mund t’i rimarrë sërish fondet e investuara. “Qeveria shqiptare mund të investojë në një të tretën e filmit dhe të synojë një pjesëmarrje, duke i rimarrë fondet që ka investuar sikur të ishte një sipërmarrës. Një investim në kinema është gjithnjë rrezik, por një rrezik i kalkuluar. Nëse në 800 mijë euro investim të kthehen 500, kjo nuk mund të quhet një humbje e madhe. Është e vështirë të mendosh në fillim për të fituar. Duhet investuar dhe më pas ta bësh të kthehet në merkato. Në këtë mënyrë mund të jenë të pranishëm dhe aktorë shqiptarë mes atyre gjermanë, italianë, francezë dhe në këtë sens, bashkëpunimi bëhet më interesant”, -shprehet Porru.
Temat
Nëse e pyet se cilat do të ishin temat që një film shqiptar të bëhej interesant në sytë e një publiku të gjerë, të huaj, producenti i Michele Placido përgjigjet natyrshëm se “ato janë të ndryshme”. Shqiptarët janë kudo nëpër Evropë. Mund të kenë tematikë që i kushtohen prezencës shqiptare në vende të tjera, por edhe filma të ambientuar në vet ambientin shqiptar. Interesi është. Por është koha të integrohet në një realitet evropian. Edhe filmi që pamë është një film i bukur, shumë emocionues që tregon se edhe me një sforco financiare shumë të vogël, mund të realizohet një film i mirë”. Nuk përjashtohen subjektet nga koha e diktaturës. Tashmë, filma të tillë e kanë provuar suksesin. Por producenti flet edhe për një aspekt tjetër bashkëpunimi, të cilin e ka diskutuar edhe me Placido. “Mund të fillonim të bënim shërbime këtu në Shqipëri. Ka një ambient interesant për xhiruar film. Mund të jetë edhe tërësisht i huaj italian apo anglez. Një gjë e tillë mund të bëhet edhe me publicitetin. Ne bëjmë shumë reklama që mund të realizoheshin këtu. Të xhirosh paratë në industrinë kinematografike duke kërkuar të bësh shërbime me aktorë, por edhe me teknikë, të hapësh laboratorë për zhvillimin e pelikulës etj, do të ishte një mundësi shumë e mirë për këtë vend”, - përfundon Stefano Porru.