Ditari i Tiranes

[kuklla]

Rindërtohet gjimnazi “Abdulla Keta”


Një tjetër objekt arsimor i rinovuar për periferinë e Tiranës. Bëhet fjalë për shkollën e mesme “Abdulla Keta” në zonën e Shkozës, e cila u rindërtua falë një kredie prej 512,855 Euro nga Banka e Këshillit të Europës (CEB).



Në përurimin e kësaj shkolle Kryetari i Bashkisë Edi Rama ka vënë në dukje se këto shkolla të reja apo tërësisht të rindërtuara, janë tempuj të dijes dhe njëkohësisht hapësira të bashkëjetesës për të rinjtë në këto komunitete periferike.


Para rikonstruksionit shkolla kishte vetëm 6 klasa të thjeshta dhe 2 laboratorë, ndërsa pas ndërhyrjes, në dispozicion të nxënësve janë 16 klasa mësimore dhe 3 laboratorë, një palestër 270 m² dhe 50 m² mjedise ndihmëse, zyra e senatit si dhe laboratorët kompjuterikë.



Si të gjitha shkollat e përfshira në këtë projekt të Bashkisë së Tiranës, për përmirësimin e infrastrukturës arsimore në kryeqytet, pajisja dhe mobilimi i të gjitha mjediseve të brendshme sipas standarteve bashkëkohore është pjesë përfshirëse e procesit të rehabilitimit. Qëllimi kryesor mbetet krijimi i kushteve cilësore në veprimtarinë shkollore duke plotësuar e respektuar standartet europiane. Për këtë janë kompletuar kabinetet e gjuhëve të huaja, laboratorët kimikë e fizikë, biblioteka, mjediset ndihmëse sportive, asistenca mjeksore ku nxënësit do të kenë mundësi këshillimi dhe trajtimi shëndetësor si dhe sistemimi i mjediseve të jashtme me gjelbërim dhe trotuare.



Gjimnazi “Abdulla Keta”, ndodhet në rrugën Ali Demi, e cila shtrihet në skajin verilindor të kryeqytetit dhe përfshihet në territorin e Njësisë Bashkiake Nr.1.



08.09.2008

[kuklla]

Përurohet segmenti që lidh Tiranën me Paskuqanin



Investimet e Bashkisë së Tiranës nuk shkojnë vetëm për qendrën. Kështu, është përuruar ditën e mërkurë një segment rrugor që lidh skajet e rrugës “Jordan Misja” dhe rrugës “Siri Kodra”, në një gjatësi prej 960 metrash linearë.



Rikonstruksioni i plotë ka marrë 67 milion lekë nga fondet e Bashkisë së Tiranës dhe në përurimin e rrugës ka qenë i pranishëm Edi Rama, i cili ka theksuar për mediat se rruga është fryt i bashkëbisedimit dhe i vendimarrjes së përbashkët me komunitetin e zonës.



Tashmë, në rrugë është e gjithë infrastruktura moderne, rrjeti i ujësjellësit, rrjeti i ujërave të bardha dhe ndriçimi, i realizuar me shtylla 8,8 metra të larta të vendosura në të dyja anët e rrugës.



Ky investim i rëndësishëm që prek dy akse rrugore është një lehtësi jo vetëm për komunitetin e zonës por edhe për banorët e komunës Paskuqan, të cilët kështu gjenden akoma më pranë kryeqytetit.



03.09.2008

[kuklla]

Tirana drejt parkimeve nëntokësore


Një shqetësim i dukshëm në qytetin e Tiranës është situata e parkimit të makinave. Kjo gjendje ndikon drejtpërdrejt në zhvillimin ekonomik të qytetit dhe cilësinë e jetës qytetare. Bashkia e Tiranës në përputhje me Planin Rregullues të Qytetit ka hartuar strategjinë e transportit, ku parashikohet edhe ndërtimi i dy parkimeve nëntokësore, në Parkun “Rinia” dhe pranë stadiumit “Qemal Stafa” në sheshin “Italia”.



Sipas Nënkryetarit të Bashkisë Eduard Shalsi, sheshi ku do të ndërtohet parkimi nëntokësor do të rikonceptohet dhe do të jetë pjesë e konkursit ndërkombëtar që pritet të organizohet për sheshin “Nënë Tereza”. Gara për ndërtimin e parkimeve nëntokësore do të jetë transparente dhe e hapur.



Në politikat e transportit të Bashkisë së Tiranës i është dhënë priorioritet lëvizjes së këmbësorëve,lëvizjes së biçikletave, ndërtimit të rrjeteve efikase të transportit publik si dhe zbatimit të një politike të drejtë parkimi.


Në të gjithë botën parkimet nëntokësore krijojnë përparësi për shtimin e sipërfaqeve të gjelbëra dhe ruajtjen e zonave për kalimtarët.



05.09.2008

[kuklla]

Mbyllet me sukses projekti “Të mësojmë duke vepruar”

Është organizuar ceremonia e mbylljes së shkollave verore, projekt i Bashkisë së Tiranës që u zhvillua gjatë muajve gusht - shtator 2008. Dita përmbyllëse u konceptua si një garë mes shkollave pjesëmarrëse në gjini të ndryshme të sportit dhe arteve.
Aktiviteti u zhvillua në mjediset e shkollës 9 vjeçare “28 Nëntori” me pjesëmarrjen e 300 fëmijëve dhe 90 mësuesve nga shkollat e tjera. Në finale juria e ngritur me këtë rast ka dhënë edhe çmime për më të mirët.
Projekti “Të mësojmë duke vepruar” u zhvillua në 10 shkolla 9-vjeçare të qytetit të Tiranës. Shkollat verore kishin si qëllim argëtimin e fëmijëve për të kaluar në mënyrë interaktive pushimet verore, si dhe shërbyen si stimul për zhvillimin e aftësive fizike e mendore të fëmijëve.

Shkollat verore bënë bashkë rreth 1500 fëmijë, përgjatë gjithë kohëzgjatjes së saj.
Më poshtë lista e shkollave fituese:
Fituesit
Kampionati i Futbollit
Shkolla 9-vjeçare “Shyqyri Peza”
kampionati i Volejbollit
Shkolla 9-vjeçare “28 Nëntori”
Kampionati i Basketbollit
Shkolla 9-vjeçare “Kushtrimi i Lirisë”
Kampionati i Kërcimit
Shkolla 9-vjeçare “Bajram Curri”
Kampionati i Shahut
Shkolla 9-vjeçare “Isa Boletini”
Konkursi i Muzikës
Çmimi i Parë
Shkolla 9-vjeçare “Kolë Jakova”
Çmimi i Dytë
Shkolla 9-vjeçare “Hasan Vogli”
Çmimi i Tretë
Shkolla 9-vjeçare “Ibrahim Brahja”
konkursi i Pikturës
Çmimi i Parë
shkolla 9-vjeçare “Shyqyri Peza”
cmimi i Dytë
Shkolla 9-vjeçare “Hasan Vogli”
cmimi i Tretë
Shkolla 9-vjeçare “Kolë Jakova”
Konkursi i Letërsisë
Çmimi i Parë
Shkolla 9-vjeçare “Hasan Vogli”
Çmimi i Dytë
Shkolla 9-vjeçare “Bajram Curri”
Çmimi i Tretë
Shkolla 9-vjeçare “Kushtrimi i Lirisë”
02.09.2008