Erjon Bogdani, në "orbitën" e Romës

[Negativ]

Roma kërkon të përforcojë sulmin në merkaton e janarit dhe afrimi më i mundshëm është Erjon Bogdani. Sulmuesi shqiptar mund të transferohet menjëherë në klubin verdhekuq, ndërkohë që nga largimi i tij Kievo do të përfitojë shërbimet e Okakas. Shkëmbimin e mundshëm ndërmjet dy klubeve të Serisë A e ka konfirmuar drejtori sportiv i veronezëve, Xhovani Sartori. Duke folur për merkaton në "romanews.eu", ai i hapi "dritën jeshile" transferimit të lojtarit të Kombëtares shqiptare. "Shkëmbimi Okaka-Bogdani është ideja jonë. Kievos mund t‘i interesojë ky ndryshim dhe kemi diskutuar me menaxherët. Ndoshta ishin këta të fundit që e publikuan këtë lëvizje", deklaroi Sartori.



"Gjithsesi do të presim dhe të shohim nëse ky shkëmbim i intereson edhe Romës. Për momentin, bisedimet janë në fazën fillestare". Nga këto fjalë zbulohet se tre prej katër protagonistëve kanë dhënë pëlqimin për këto ndryshime. Kievo ka gjetur marrëveshjen me dy menaxherët e futbollistëve, me Alesandro Moxhin për Bogdanin dhe avokatin Domeniko Skopeliti për Okakan. Për të plotësuar tablonë mungon vetëm "Ok" i Romës, që nuk duhet harruar se në të kaluarën ka treguar në disa raste interes për sulmuesin kuqezi, i cili u transferua në kampionatin italian në janar të vitit 2000, kur filloi të luante me Rexhinën.

Për momentin, drejtuesit e Romës preferojnë të fitojnë kohë dhe nuk shprehen publikisht. Por, diçka është e sigurt: ekzistojnë të gjithë parametrat për të arritur marrëveshjen, ku kryesorja është ana ekonomike. Bogdani te Kievo përfiton afro 750 mijë euro neto në sezon, rrogë e cilësuar e lartë për arkat e veronezëve, por që gjithsesi është paguar përgjysmë nga klubi. Pra, deri në qershor, 31-vjeçari do t‘u kushtonte verdhekuqve diçka më pak se 600 mijë euro. E njëjta gjë mund të thuhet edhe për Okakan, i cili së fundmi ka rinovuar kontratën për të qëndruar në kryeqytetin italian deri në vitin 2012, për më pak se 500 mijë euro neto në sezon. Palët e interesuara pritet të takohen në ditët në vazhdim, sepse më parë drejtori sportiv i Romës, Daniele Prade, duhet të diskutojë me trajnerin Luçiano Spaleti. Nëse drejtuesi i stolit do t‘i hapë rrugë shkëmbimit, gjithçka mund të realizohet sa hap e mbyll sytë, madje Erjon Bogdani mund të jetë i gatshëm për nënkampionët e Serisë A që prej 14 janarit. Në këtë datë, Roma dhe Sampdoria luajnë sfidën e prapambetur, ku verdhekuqtë janë pa kapitenin Françesko Toti (i dëmtuar) dhe malazezin Vuçiniç (i skualifikuar). Bogdani në stol në vend të Okakas shihet si zgjidhja e duhur.

Roma, që përveç kampionatit mendon edhe për Ligën e Kampioneve, po shqyrton edhe alternativa të tjera për merkaton e verës, ku në listën e dëshirave janë argjentinasi i Fiorentinës, Osvaldo dhe sulmuesi i Kombëtares gjermane, Lukas Podolski. Ndërkohë, për Bogdanin kanë shprehur interes edhe disa skuadra të tjera në Itali. Bolonja kërkon një sulmues me peshë dhe synon shqiptarin, ndërkohë që te Kievo mund të kalojë Bernaçi. "Er-Bomber" ndiqet edhe nga Palermo, që kërkon një qendërsulmues dhe mundësia e transferimit në Sicili nuk është fantazi.
Futbolli-shqiptar.
Ja dhe Videoja http://www.youtube.com/watch?v=hRz_Ez-9aew

[Negativ]

Roma i mbyll derën Erjon Bogdanit
Roma refuzon Erjon Bogdanin. Edhe pse vetëm pak ditë më parë transferimi i sulmuesit shqiptar te verdhekuqtë dukej i përfunduar, në orët e fundit gjithçka ka ndryshuar.



Pas konsultimit me trajnerin Luçiano Spaleti, drejtuesit e klubit të kryeqytetit italian refuzuan ofertën e Kievos për shkëmbim 6-mujor, ku Bogdani do të luante te nënkampionët e Italisë, ndërsa te veronezët do të kalonte Okaka.

Gazeta sportive “Corriere dello sport” citonte: “Transferimi i sulmuesit të ri Okaka te Kievo përfundimisht nuk do të mund të realizohet. Roma ka refuzuar shkëmbimin me Bogdanin”. Për sulmuesin e Kombëtares kuqezi, skuadra e Spaletit ishte alternativa më e mirë.

Aty Bogdani do të luante në nivele të larta (Roma është mes 16 skuadrave që u kualifikuan nga faza e grupeve në Ligën e Kampioneve) dhe aktivizimi nuk do të mungonte. Verdhekuqtë garojnë në tre kompeticione dhe nuk kanë në kontingjent një sulmues me karakteristikat e 31-vjeçarit. Tashmë që kjo mundësi u venit, për lojtarin alternativat më të mira mbeten Bolonja e Palermo.

Të dyja këto klube, që konkurrojnë për mesin e klasifikimit në Serinë A e vlerësojnë lojën e Bogdanit, por ende nuk janë interesuar zyrtarisht.

E ardhmja e Bogdanit është e pasigurt edhe për shkak të “Calciopolit” në kampionatin italian. Largimi i tij nga Kievo duket i sigurt, por destinacioni nuk është i qartë.

Për të përkeqësuar situatën vetëm pak orë më parë është zyrtarizuar edhe vendimi për menaxherin e sulmuesit, Alesandro Moxhi (djali i famëkeqit Luçiano Moxhi), që u dënua nga Gjykata e Shkallës së Parë me një vit e dy muaj burg.

Për shkak se ngjarjet kanë ndodhur përpara aprovimit të ligjit (në vitin 2006), menaxheri nuk do të shkojë pas hekurave, por impenjimi për t’u shpallur i pafajshëm në Gjykatën e Apelit, natyrisht që nuk do t’i lejë shumë kohë për sistemimin e Erjon Bogdanit.