Policia vret 50-vjeçarin që shtiu në ta

[EMAUS]

Policia vret 50-vjeçarin që shtiu në ta

Nga Dafina Myrtaj

S. Sovrliq nga Zubin Potoku, ka ndërruar jetë, pas plumbave të marrë nga pjesëtarët e Policisë së Kosovës. Policët thonë se janë detyruar të qëllojnë drejt 50-vjeçarit të përkatësisë serbe, pasi që ai kishte qëlluar me armë zjarri drejt anëtarëve të familjes së tij dhe drejt pjesëtarëve të Policisë së Kosovës.

Zyra për Informim e Policisë në Mitrovicë ka saktësuar se policia fillimisht kishte marrë një informatë përmes telefonit se një person është duke ushtruar dhunë familjare.

“Rreth 30 minuta pas mesnate, të ditës së mërkurë, policia është informuar përmes një telefonate të drejtuar nga një banor i Zubin Potokut, për rastin në fjalë. Ankuesi ka njoftuar policinë se i dyshuari i këtij rasti, S. Sovrliq, babai i shokut të tij, ishte duke ushtruar dhunë në familje, ndërsa me armë zjarri kishte shtënë në drejtim të djalit të tij”, tha Besim Hoti, zëdhënës i Policisë për rajonin e Mitrovicës.

Pas arritjes në vendin e ngjarjes, njësitë e para reaguese patrulluese të stacionit Zubin Potok, kishin identifikuar të dyshuarin i cili mbante një revole në dorë. Më pas, me të vërejtur policinë, i dyshuari ishte ngjitur shkallëve të shtëpisë në katin e dytë.

“Policët me të hyrë në shtëpi, arrijnë që fillimisht të evakuojnë anëtarët e tjerë të shtëpisë, të cilët ishin mbyllur në një dhomë tjetër për të shmangur rrezikun e drejtpërdrejtë nga të shtënat me armë zjarri nga kryefamiljari i shtëpisë”, tha Hoti.

Derisa policët patrullues po tentonin që me fjalë të bindin të dyshuarin të dorëzohet, i njëjti nga kati i dytë i ndërtesës kishte qëlluar disa herë me armë në drejtim të pjesëtarëve të policisë që kanë qenë në vendin e ngjarjes.

Një nga plumbat e shkrepur kishte goditur në gjoks njërin nga policët, mirëpo për fat të mirë, ai kishte shpëtuar pa asnjë lëndim pasi që plumbi i është ndalur në jelekun antiplumb të policit.

Duke parë se jeta e policëve dhe e familjarëve është në rrezik, policët në vetëmbrojtje i janë përgjigjur sulmuesit me zjarr, me ç’rast, personi i dyshuar është qëlluar për vdekje.

Mjekët kujdestarë të Shtëpisë së Shëndetit në Zubin Potok të cilët janë ftuar në këtë rast, kanë konfirmuar vdekjen e personit 50-vjeçar.

Prokurori publik i prokurorisë ndërkombëtare, i cili është informuar lidhur me rastin, është paraqitur në vend të ngjarjes dhe i njëjti ka autorizuar që trupi i pajetë i personit të dërgohet në Institutin e Mjekësisë Ligjore në Prishtinë për proces të autopsisë.

Sipas prokurorit ndërkombëtar, intervenimi policor është kualifikuar si veprim i ligjshëm i policisë në vetëmbrojtje gjatë intervenimit në rastin e raportuar si “vrasje në tentativë”.

Në vend të ngjarjes, hetuesit policorë dhe teknikët e kriminalistikës së Policisë të Kosovës dhe të policisë së EULEX-it, kanë gjetur dhe identifikuar së paku 12 gëzhoja të revoles së tipit “TT”, e cila ishte përdorur nga i dyshuari në këtë rast. Besohet se së paku shtatë nga këto 12 plumba të shkrepur nga i dyshuari kanë qenë të drejtuara drejt zyrtarëve të policisë.

Veç armës e cila ishte e përdorur në këtë rast, policia ka gjetur dhe sekuestruar edhe tri pushkë të tjera në mesin e tyre një snajper pushkë dhe dy armë gjahu.