Varfëria, rritet numri i femrave që prostituojnë

[EMAUS]

Qendra "Aksion Plus", pohon se kriza ekonomike po rrit numrin e prostitutave. Raporti i USAID: "Tashmë janë edhe të arsimuara"



Varfëri dhe prostitucion. Është pikërisht kriza ekonomike që po çon në rritjen e numrit të femrave, që, në këmbim të seksit, përfitojnë para për të siguruar mbijetesën. Ky është një fenomen që po vihet re gjithnjë e më shumë në vendin tonë. Fatkeqësia e këtij realiteti qëndron në faktin se vetë të afërmit i nxisin këto viktima të prostituojnë. Këtë e pohon për gazetën mjeku i qendrës së "Aksion Plus", Kahreman Harxhi, i cili pret çdo ditë në këtë qendër jo vetëm përdorues droge, por edhe punonjëse seksi. Ndërsa në raportin e fundit të USAID-it për viktimat e trafikimit, bëhet e ditur se, tashmë, kësaj rruge i janë futur edhe femrat e arsimuara.


Varfëria
"Kriza ekonomike po reflektohet në një mënyrë shumë të ashpër. Po ndikon në rritjen e numrit të prostitutave dhe këtë e vëmë re çdo ditë e më shumë gjatë punës sonë të përditshme",- pohon Kahreman Harxhi, duke shtuar se kjo kategori nuk shikon asnjë rrugë tjetër për të siguruar mbijetesën. Ndërkohë, ai pohon se shumë nga përdoruesit e drogave, në pamundësi për të gjetur të ardhura për të marrë drogë, ofrojnë shërbim seksi. Ndërsa në raportin e fundit të USAID-it për viktimat e trafikimit, thuhet se 27 për qind e femrave janë bërë viktima të trafikimit, për arsye të kushteve të vështira ekonomike dhe, 30 për qind e tyre kanë rënë pre e trafikimit në kërkim të një të ardhmeje më të mirë.


Arsimimi
Nëse të dhënat e studimeve apo raporteve të mëparshme, të përgatitura nga organizma të ndryshëm qeveritarë e joqeveritarë, tregojnë se niveli i ulët arsimor i viktimave është një ndër faktorët më të rëndësishëm që krijon rritje të cenueshmërisë nga dukuria e të rënit pre e trafikimit, raporti i fundit i USAID-it, tregon të kundërtën. "Pothuajse një e dyta e viktimave të trafikimit e kanë kryer arsimin e detyrueshëm 8-vjeçar, duke e lënë shkollën në moshën 14 vjeç. Ndërsa 18 për qind e tyre e kishin mbaruar shkollën e mesme",- bëhet e ditur në raport, duke u theksuar se janë shënuar raste edhe me viktima që e kanë mbaruar universitetin.


Raporti i fundit i USAID-it, për viktimat e trafikimit: "Vetëm 4 % e tyre janë rrëmbyer me dhunë"
USAID: Në 58 % të rasteve, viktimat trafikohen nga të afërmit


Fenomeni i prostitucionit po bëhet akoma më tronditës, pasi trafikantët e tyre, tashmë janë vetë të afërmit e tyre. Raporti i fundit i USAID-it për Trafikimin e Qenieve Njerëzore, bën të ditur se 58 për qind e viktimave të trafikimit që u është dhënë ndihmë në strehëzat përkatëse, rrëfejnë se ishin rekrutuar nga dikush që e njihnin. "Këtu përfshihen bashkëshortët, të fejuarit, fqinjët, ose të afërm të tjerë të viktimës. 30 për qind e tyre janë rekrutuar nga të panjohurit dhe vetëm 4 për qind janë rrëmbyer me dhunë",- bëhet e ditur në raportin e fundit të USAID-it, duke u shtuar se kërkimi i një jete më të mirë në vendet e tjera, kryesisht për punë, si edhe niveli më i ulët ekonomik, janë dy faktorët shtytës më kryesorë, që nxisin cenueshmërinë e viktimave të trafikimit. Po sipas këtij raporti, fëmijë nën moshën 18 vjeç dhe pothuajse asnjë rast mbi moshën 30 vjeç, janë grupmosha më dominuese e trafikimit. Në raport bëhet e ditur se kjo grupmoshë është më e preferuar për trafikantët, për faktin se sjell më shumë fitime dhe është më e lehtë të bien pre e trafikantëve. Ndërsa, sa i takon gjendjes civile, më shumë se një e dyta, sipas raportit, janë të pamartuara. "Ka një korrelacion të ngushtë midis pjesës 35 për qind të viktimave që janë të martuara ose të shkurorëzuara, dhe pjesës 36 për qind të po të këtyre grave dhe vajzave, që janë tërhequr për të rënë në trafikim, përmes premtimeve të rreme për marrëdhënie dashurie",- thuhet në raport.


Qahi: Trafikimi i femrave, tashmë brenda kufijve


Mund t'u them se, tashmë, po vihet re trafikimi brenda territorit të vendit, dhe kjo ka disa arsye. Këtë e ka pohuar në një intervistë për "Shekulli"-n, pak kohë më parë, drejtori i Qendrës Kombëtare të Viktimave të Trafikimit, Xheladin Qahi, i cili ka theksuar se kjo lidhet me disa arsye dhe, e para është mundësia që ky treg ka për të frekuentuar këto viktima. Arsyeja e dytë, sipas tij, është vështirësimi i kalimit të kufijve në mënyrë të paligjshme jashtë vendit, për t'i tregtuar ato. Arsyeja e tjetër është se ka shumë prej tyre që vijnë nga zona shumë të varfra, pa një bazë ekonomike dhe, shpresa se në qytetet e mëdha do të vijnë dhe do të gjejnë parajsën, i dërgon drejt kësaj rruge, duke u bërë viktima të trafikimit. Pjesa më e madhe e tyre vijnë nga zona rurale dhe gjendja ekonomik e tyre është mizerabël. "Në përgjithësi, janë vajza që kanë vetëm njërin prind dhe janë të papuna. As vetë nuk kanë mundësi të punësohen në vendet e tyre. Për një jetë më të mirë, kërkojnë ndihmë tek dikush. Fillimisht vijnë për një punë më të mirë në Tiranë ose Durrës dhe fillojnë, kryesisht, punë si kameriere, pastaj i plotësojnë me shërbime shtesë, që është prostitucioni",- pohon Qahi.


"Kriza ekonomike po reflektohet në një mënyrë shumë të ashpër. Po ndikon në rritjen e numrit të prostitutave dhe këtë e vëmë re çdo ditë e më shumë, gjatë punës sonë të përditshme"


"Pothuajse një e dyta e viktimave të trafikimit, e kanë kryer arsimin e detyrueshëm 8-vjeçar, duke e lënë shkollën në moshën 14 vjeç. Ndërsa 18 për qind e tyre, e kishin mbaruar shkollën e mesme"
60 për qind e viktimave të trafikimit janë rekrutuar nga dikush që e njihnin, sipas raportit të USAID-it
4 për qind e viktimave të trafikimit janë rekrutuar nëpërmjet rrëmbimit, sipas raportit të USAID-it

Eglantina Bardhi
Shekulli Online

[girl08]

Fatkeqesisht eshte nje realitet me te cilin duhet te perballemi....
Por eshte dicka e tmerrshme kur ata detyrohen ta kryejne kete profesion, sidomos nga njerez te njohur...