Shqipëria i kthen borxhin Greqisë

[EMAUS]

Kuvend - Miratohet marrëveshja për shlyerjen e borxhit ndaj Greqisë. Komisioni Parlamentar i Ekonomisë dhe Financave miratoi dje marrëveshjen ndërmjet qeverisë shqiptare dhe asaj greke për shlyerjen e borxhit të rrjedhur nga marrëveshja ndërmjet Bankës së Shtetit Shqiptar dhe konsorciumit të bankave greke, datë 24.6.1991.

Qeveria shqiptare kishte detyrime të pashlyera ndaj shtetit grek, të krijuara gjatë sistemit komunist. Detyrimet ishin konkretisht ndaj Bankës Kombëtare të Greqisë dhe Organizatës së Sigurimit të Kredive të Eksportit, në masën 48 milionë dollarë. Sipas të dhënave zyrtare, borxhi është marrë gjatë viteve 1987-1991, kur Shqipëria po kalonte momente të vështira ekonomike, ndërsa sistemit komunist po i vinte fundi.

Shteti ynë i kishte Bankës Kombëtare të Greqisë 7,5 milionë dollarë, ndërsa diferenca i takon Organizatës së Sigurimit të Kredive të Eksportit. Qeveria shqiptare kishte detyrime të pashlyera ndaj shtetit grek, të krijuara gjatë sistemit komunist.

Ditët e shkuara: Projektligji - Marrëveshja për kthimin e 40.6 milionë dollarëve që u morën në vitin 1991. Shqipëria i kthen borxhin Greqisë, 2 milionë dollarë çdo 6 muaj. Huaja financiare e marrë nga qeveria shqiptare në vitin 1991 do t’i kthehet shtetit grek brenda 10 viteve. Kuvendi pritet të miratojë marrëveshjen e kthimit të borxhit që parashikon shlyerjen e një detyrimi prej 40 milionë dollarësh. Pala shqiptare ka marrë këtë borxh në formën e kredive në vitin 1991.

Sipas detajeve që shoqërojnë vendimin e qeverisë, marrëveshja fillestare është bërë nga Banka e Shqipërisë, më 24 qershor të vitit ’91 me konsorciumin e bankave greke. Në shlyerjen e këtij detyrimi financiar parashikohet dhe përqindja e interesit. Hapja e Shqipërisë në vitin 1991 solli dhe një kërkesë të qeverisë për financime në përballimin e krizës ekonomike.

Në këtë linjë dhe huaja e marrë nga shtetit fqinj është vlerësuar si një zgjidhje e domosdoshme. Me nisjen e pagimit të këtij borxhi, shteti shqiptar parashikon të ulë detyrimet financiare që ka ndaj vendeve që kanë kontribuar. Borxhi i jashtëm është përdorur nga qeveria si një mënyrë për të ruajtur kursimet kombëtare dhe plotësimin e kërkesave për investime. Borxhi ndaj palës greke llogaritet të shlyhet në vitin 2018.

Për efekte të interesit, marrëveshja ka përcaktuar si datë pagesë të parë datën 30 tetor 2008, ndërkohë që dokumenti dërgohet për miratim në muajin prill 2009. Pagesat e tij do të bëhet me këste në çdo gjashtëmujor. Në këtë mënyrë, çdo gjashtë muaj, Banka e Shqipërisë do të derdhi në bankat greke, me të cilat është bërë marrëveshje, një shumë prej rreth 2 milionë dollarësh. Një shifër e konsiderueshme kjo, por që, në bazë të kontratave të pranuara nga pala shqiptare, është brenda standardeve. Marrëveshja në fjalë pas miratimit nga Kuvendi do të kalojë për zbatim në Ministrinë e Financave, e cila do të bëjë llogaritjen në arkën e shtetit.

KREDITE: Në raportin e vitit 2008, Banka e Shqipërisë tërhiqte vëmendjen e qeverisë për shtimin e detyrimeve që rrjedhin si pasojë e borxhit të jashtëm. Ndërkohë që dhe institucionet ndërkombëtare kanë theksuar se në ndërtimin e veprave madhore duhet të kihet kujdes me marrjen e kredive.

Të mbytur në borxhe: Në total 1.8 miliardë dollarë

Projektet e qeverive kanë bërë që borxhi i jashtëm i vendit, sipas të dhënave të Bankës së Shqipërisë, të thellohet. Për vitin që lamë pas shifra e borxheve të qeverisë llogaritej në rreth 1.8 miliardë dollarë. Një shifër e konsiderueshme kjo duke qenë se çdo qindarkë i bie të paguhet nga xhepat e taksapaguesve. Por, veç shumave fillestare, ato që e shtojnë më shumë nivelin e borxhit janë interesat. Gjata vitit 2008 vetëm për interesat e huave është paguar 28 milionë euro.

Marrëveshja e 1991: Si paguhen interesat e borxhit

Në bazë të marrëveshjes së bërë në vitin 1991, pala shqiptare llogarit të paguajë rreth 24 milionë dollarë interesa për 17 vite. Sipas vendimit të qeverisë, shuma fillestare e marrë nga Banka e Shqipërisë ka qenë 16,297,033 dollarë. Në këtë mënyrë duke llogaritur interesat dhe maturimin e kredisë, shuma finale është 40,694,906 dollarë. Marrëveshja e shlyerjes së borxhit është bëra nga qeveria e Shqipërisë dhe Ministria e Financave dhe Ekonomisë së Greqisë, si dhe Organizatës së Sigurimit të Kredive (ECIO).

www.gazetalibertas.com