Greqia, projekt për heqje vizash

[EMAUS]

Marrëveshjet: Afrimi i zgjedhjeve ka provokuar angazhimin e PS-së dhe PD-së drejt “blerjes” së rolit të Athinës në zhvillimet shqiptare. Premtimet: vizat nga Karamanlis për Berishën dhe votat e emigrantëve nga PASOK-u për PS-në. Dilemat e vizitës së kryeministrit grek në Tiranë, më 26 prill. Greqia, projekt për heqjen e vizave për shqiptarët. Gjyqi “Bollano” ngre pikëpyetje mbi agjendën diplomatike të Karamanlisit. Kryeministri grek Kostas Karamanlis pritet të vizitojë Shqipërinë më 26 prill.

Edhe pse jo e paraqitur zyrtarisht për mediet, për shkak të disa problemeve që janë shfaqur së fundmi në Parlamentin helen, vizita e kreut të qeverisë helene pritet të jetë një tur diplomatik me rëndësi të dorës së parë. Burime pranë qeverisë shqiptare thanë për gazetën “Libertas” se mbërritja e Karamanlisit konsiston me një agjendë shumë domethënëse, që pritet të ketë pasojat e veta të prekshme, në prag të zgjedhjeve elektorale të 28 qershorit.

Kështu, sipas këtyre burimeve, heqja e vizave, si pjesë e një marrëveshjeje dypalëshe, është një prej pikave kryesore të takimit me kryeministrin shqiptar Sali Berisha, i cili, në këmbim të kësaj, ka gati akordin “territorial” të “Shelf-Kontinentalit”, i cili parashikon lëshimin e një pjese të vijës ujore dhe shkëmbinjve ujorë në favor të Greqisë. Njohja e vijës kufitare me Shqipërinë, si dhe heqja e bllokut të vizave për Tiranën, është pjesa tregtare e marrëveshjes, e cila i krijon homologut shqiptar të Karamanlisit lehtësi politike, në prag të zgjedhjeve elektorale të 28 qershorit.

Por ajo që vendos një pikëpyetje rreth kësaj vizite është media greke, e cila “ka përfituar” nga “gabimi” shqiptar i dënimit të vasal Bollanos, pikërisht pak përpara vizitës së kryeministrit grek.

Më thjeshtë, gjyqi ndaj kreut të Bashkisë së Himarës po merret nga subjekte të ndryshme të shtetit fqinj si një ngjarje politike me peshë, e cila mund ta vërë në vështirësi kreun e qeverisë greke, në agjendën e tij shqiptare. Akordi i vizave, të cilin Berisha e ka marrë deri më tani, vetëm teorikisht nga Italia, është një kosto që duhet marrë në konsideratë, edhe pse “gabime” të këtij lloji vështirë se janë më rastësi apo shprehje e nervozizmit reciprok.

“Anulimi i turit diplomatik të Karamanlisit është shumë aktual, për shkak të kësaj ndërhyrjeje të pakuptimtë të autoriteteve të Tiranës, pak përpara mbërritjes së tij. Më thjeshtë, gjyqi ndaj kreut të Bashkisë së Himarës po merret nga subjekte të ndryshme të shtetit fqinj si një ngjarje politike me peshë”

Zgjedhjet: Opozita, thirrje në Athinë për kthimin elektoral të 800 mijë shqiptarëve. PAKTI PS-PASOK, PËR VOTËN E EMIGRATËVE. Edhe pse “jashtë Evropës”, vendimmarrja politike dhe elektorale në Tiranë shfaqet si pjesë e zhvillimeve ndër rajonale. Emigrantët shqiptarë, të përjashtuar për vite me radhe nga e drejta praktike e ushtrimit të votës, duket se “do të përfitojnë” nga një skemë bashkëpunimi mes socialistëve shqiptarë dhe atyre grekë. Kjo e fundit synon një rotacion pushteti në të dy kryeqytetet fqinje, pikërisht përmes shfrytëzimit të potencialit elektoral të rreth 800 mijë shqiptarëve që banojnë prej vitesh në shtetin fqinj.

Në përpjekje për të arritur këtë objektiv shumë ambicioz, Partia Socialiste e Shqipërisë “ka fituar të drejtën” e afishimit të devizave të veta elektorale në Athinën fqinje, ku i bëhet thirrje komunitetit të madh të emigrantëve që të kthehen për të votuar më 28 qershor, në zgjedhjet parlamentare të Shqipërisë. “Me bindjen e demokratizimit dhe të perspektivës evropiane të Shqipërisë, zgjedhjet politike nuk mund të përfundojnë pa pjesëmarrjen e rreth 800 mijë emigrantëve dhe grekëve të Shqipërisë që jetojnë në Greqi. Ne ju ftojmë që të bashkojnë forcat për zgjedhjet e ardhshme të 28 qershorit”, citon gazeta greke “Apogevmatini”, një njoftim të selisë rozë në kryeqytetin fqinj.

Po sipas këtij organi mediatik, qëllimi i apelit politik të PS-së është të maksimalizojë, përmes një manovre të koordinuar me PASOK-un grek, përfitimin elektoral më 28 qershor të këtij viti. Këmbimi që ofrohet në kuadër të këtij akordi është influencimi maksimal ndaj emigracionit shqiptar në Greqi, në orientimin e tij në proceset elektorale të Athinës.

Është i njohur fakti se shteti fqinj është duke e njohur të drejtën e votës për emigrantët, çka përbën një shans të mirë për komunitetin e legalizuar shqiptar, i cili ka fituar kështu statusin e një leve politike kyçe në marrëdhëniet mes dy vendeve. Është për t’u nënvizuar se puna politike me këtë kontingjent po zhvillohet nga e majta, çka u jep 800 mijë emigrantëve perceptimin e një komuniteti që është në opozitë me qeverinë e Karamanlisit.

Deklarata e kryebashkiakut: Bollano: Do t’i shkoj deri në fund! “Ky është një gjyq i stisur politik, nga njerëz që u shërbejnë segmenteve të caktuara ekonomike dhe politike. Pasi, në bazë të asaj që shkruhet në Kushtetutën e Shqipërisë, si kryebashkiak unë kam të drejtë, në bazë të ligjit, të marr vendime, si ato që mora në territorin që kam në juridiksion të bashkisë që drejtoj.” Kështu është shprehur për gazetën “Libertas”, pak orë pas dënimit nga Gjykata e Vlorës, kreu i Bashkisë së Himarës, Vasil Bollano.

Duke folur për reagimin e mëtejshëm të tij, në kuptim të ndjekjes së çështjes, ai ka bërë të ditur se do të vijojë me apelimin dhe zbatimin e kërkesave që parashikon kuadri ligjor i Shqipërisë. “Unë do t’i shkoj çështjes deri në fund, në të gjitha instancat e gjykimit, derisa të dalë pafajësia ime!”, theksoi ai. Bollano u dënua nga Gjykata e Vlorës me 6 muaj burg, me gjobë prej 5 milionë lekësh, si dhe me 3 vjet moslejim të ushtrimit të funksioneve publike.

Kjo masë prezumon pezullimin e tij nga detyra aktuale dhe kalimin në zgjedhje të parakohshme. Në termat politike dhe ato të nëntekstit të marrëdhënieve brenda koalicionit të djathtë, gjyqi i fundit evokon një kërkesë për riekulibrim që, sipas gjasave, do të filtrohet nga një demonstrim forcash, ku sërish përballë palës “greke” ndodhet “nacionalisti” Berisha.

I hiqet edhe e drejta e funksioneve për tre vjet. Gjykata “kryqëzon” Bollanon, 6 muaj burg dhe 500 mijë lekë gjobë. Gjykata vendos 6 muaj burg dhe 500 mijë lekë gjobë, për kryetarin e Bashkisë së Himarës, Vasil Bollano, si dhe t’i hiqet e drejta e ushtrimit të funksioneve publike për tre vjet.
Me gjithë mungesën e Bollanos dhe madje edhe të avokatit të tij, Curri, gjykata vendosi të shpallë vendimin e të mos e shtyjë atë deri në praninë e të interesuarve.

Në përfundim të hetimit gjyqësor, në seancën e djeshme, që u zhvillua në mjediset e Gjykatës së Shkallës së Parë Vlorë, pa praninë e të akuzuarit, si dhe pa avokatin mbrojtës të Bollanos, gjyqtari i seancës Shkëlzen Selimi, e deklaroi Bollanon fajtor. Sipas tij, nga shqyrtimi i çështjes në tërësi dhe nga vlerësimi i provave, rezulton se Bollano ka shpërdoruar detyrën e tij publike, duke urdhëruar heqjen dhe çmontimin e sinjalistikës rrugore, në segmentin Llogora-Qeparo, pjesë e rrugës kombëtare Vlorë-Sarandë.

Kreu i trupit gjykues, nënvizoi se nga dy urdhra të lëshuara prej kryebashkiakut himarjot, janë dëmtuar interesat shtetërore, e shoqëruar kjo me një dëm financiar prej rreth 1.8 milionë lekësh.
Gjyqtari Shkëlzen Selimi, në arsyetimin e vendimit, përcaktoi se në çështjen në ngarkim të tij, kryetari i Bashkisë së Himarës është marrë në cilësinë e të pandehurit si përfaqësues publik dhe jo i ndonjë organizate, siç është shprehur ai dhe avokati i tij.

Ai rrëzoi pretendimet e të pandehurit, të paraqitura në seancë e kaluar, përmes avokatit të tij, sipas të cilit, fakti për të cilin akuzohet Bollano nuk përbën vepër penale, por urdhrat e dhëna janë në përputhje me atributet e parashikuara në Ligjin “Për Organizimin dhe Funksionimin e Qeverisjes Vendore”.
Selimi saktësoi se, rrugët kombëtare janë nën administrimin e Drejtorisë së Përgjithshme të Rrugëve dhe jo të njësive të qeverisjes vendore. Në këto kushte dhe duke vlerësuar provat e paraqitura nga organi i akuzës, gjyqtari Shkëlzen Selimi e deklaroi Bollanon fajtor, i cili, ka konsumuar elementë të veprës penale të shpërdorimit të detyrës, e parashikuar në nenin 248 të Kodit Penal.

vazhdon...............

[EMAUS]

Përveç dënimit me 6 muaj burg dhe 500 mijë lekë gjobë, kryebashkiakut himarjot i hiqet edhe e drejta e ushtrimit të funksioneve publike, për një periudhë 3-vjeçare. Në vendimin e djeshëm përcaktohej gjithashtu se, dënimi me heqje lirie do të kryhet në një burg të sigurisë së ulët, ndërkohë që shlyerja e detyrimit financiar do të realizohet brenda një periudhe njëvjeçare, nga momenti që vendimi do të marrë formën e prerë.

Seancën e kaluar: Avokati kërkoi pafajësi për klientin, prokuroria 1 vit burg. Në seancën e kaluar, të zhvilluar më datën 7 prill, avokati mbrojtës Petraq Curri, kërkoi pafajësi për kryetarin e Bashkisë së Himarës, duke u shprehur se akuza ndaj tij nuk përbën fakt penal. Kjo, sipas avokatit, është pjesë e atributeve dhe kompetencave të kreut të njësisë së qeverisjes vendore, të cilat ai i ushtron duke u bazuar në Ligjin “Për Organizimin dhe Funksionimin e Qeverisjes Vendore”, ndërkohë që për vendosjen e tabelave të sinjalistikës rrugore, në kuadrin e një projekti të financuar nga Banka Botërore, në bazë të marrëveshjes, duhej të kishte një leje ndërtimi nga KRRT-ja e bashkisë.

Gjithashtu, avokati mbrojtës akuzoi prokurorinë për politizim të çështjes në ngarkim të klientit të tij. Por ky pretendim u kundërshtua ashpër në seancë nga përfaqësuesi i organit të akuzës, prokurori Sokol Malaj, i cili argumentoi të kundërtën. Në seancën e datës 10 mars, Prokuroria e Vlorës kërkoi 1 vit burg dhe 500 mijë lekë gjobë për Bollanon.

Procesi gjyqësor: Akuzat për heqjen e sinjalistikës dhe dëmi prej 1.8 milionë lekësh. Seanca e djeshme ishte e 16-a, në çështjen gjyqësore në ngarkim të kryebashkiakut himarjot, e cila ka nisur në muajin korrik të vitit të kaluar. Shkak për këtë çështje janë bërë dy urdhra të lëshuara prej tij për policinë bashkiake në muajt tetor dhe dhjetor të vitit 2007, për heqjen e tabelave në gjuhën shqipe, në aksin rrugor Qeparo-Llogora. Sipas prokurorisë, kjo ka sjellë një dëm prej rreth 1.8 milionë lekësh.

Këto tabela ishin vendosur në kuadrin e një projekti për zhvillimin e turizmit, i shtrirë në segmentin nga Vlora në Sarandë, financuar nga Banka Botërore, në bashkëpunim me Ministrinë e Transportit Punëve Publike dhe Komunikacionit dhe Ministrinë e Turizmit, Kulturës, Rinisë e Sporteve, me një vlerë prej rreth 6 milionë lekësh. Përmes këtyre tabelave, evidentoheshin objektet me vlerë historike, arkeologjike e turistike të zonës, mes të cilave plazhi i Dhërmiut, kalaja e Himarës, kalaja e Porto Palermos etj.

Gjatë fazës së hetimit, Bollano ka pranuar se ka urdhëruar heqjen e tabelave në gjuhën shqipe, por ai ka pretenduar se për vendosjen e tyre nuk ishte marrë leje nga bashkia. Si dhe nuk ka pranuar se ka kërkuar të shkruhen dhe në gjuhën greke, si akuzohet. Vasil Bollano është zgjedhur në krye të Bashkisë së Himarës për dy mandate radhazi.

www.gazetalibertas.com