Qeveria të marrë masat për krizën ekonomike

[ReniX]

Kreu i shtetit kërkon marrjen e masave për përballimin e krizës. Në 90 vjetorin e krijimit të ONP, Presidenti Top i kërkon jo vetëm qeverisë, por edhe partnerëve sociale të marrin masa për mbrojtjen e qytetarëve nga kriza ekonomik. Version multimedial i ketij lajmi

Kur qeveria shqiptare ende nuk ka pranuar se është prekur nga kriza ekonomike globale, Presidenti i Republikës, por edhe Drejtori i Organizatës Ndërkombëtare të Punës i bëjnë thirrje ekzekutivit të marrë masa në përballimin e saj. Në 90 vjetorin e Organizatës Ndërkombëtare të Punësimit, kreu i shtetit Bamir Topi kërkoi marrjen e masave për përballimin e efekteve të krizës si dhe rishikimin e strategjisë së punësimit.

"Për përballimin e ndonjë çekuilibri që mund të krijohet nga efektet e krizës globale duhet që të gjithë së bashku ta marrim me një seriozitet të veçantë, pa u përpjekur për të nxjerrë përfitime të çastit, por duke marrë të gjitha masat e nevojshme për sigurimin e burimeve reale me të cilat do të bëhet financimi i mbrojtjes shoqërore"- u shpreh Presidenti Topi në fjakën e tij.

Më tej Topi theksoi se "rëndësi dhe rol të veçantë, në situatën e krijuar, mund dhe duhet të luajë Këshilli Kombëtar i Punës. Mbështetja e punësimit me anë të stimulimit të rritjes ekonomike, investimet në arsim dhe trajnimi me anë të politikave aktive të tregut të punës, janë tre aspirata që meritojnë vemendjen, përkushtimin dhe përpjekjet e përbashkëta të qeverisë, të organizatave të punëdhënësve dhe të punëmarrësve".

"Përballimi i efekteve të mundshme të krizës kërkon rishikimin e strategjisë, ose masave të punësimit të rinisë, të grave, veçanërisht, në zonat periferike të qyteteve të mëdha, duke i kushtuar rëndësi të veçantë nxitjes së eksporteve"- tha ndër të tjera Presidenti i vendit Bamir Topi.

Nga ana tjetër drejtori për europën juglindore të Organizatës Ndërkombëtare të Punës ILO, i ka bërë të qartë qeverisë shqiptare se vendi e ka të pashmangshme mos prekjen nga kriza. Zoti Levin bën të qartë dy faktorë që bëjnë të mundur prekjen nga kriza, rënien e eksporteve si dhe rënien e remitancave.

"Ka shumë tregues që bëjnë vlerësimin e krizës ekonomike, në Shqipëri tregues me rëndësi është çështja e eksporteve. Nëse vihet re rënie e eksporteve të vendit, kjo do të thotë se në vend ka mbyllje të njësive ekonomike, çka pasqyrohet në rritjen e papunësisë. Rasti tjetër është rënia e remitancave, që kanë të bëjnë me paratë që sjellin emigrantët, ndaj kur pakësohen japin efekt në komunitet dhe në familje dhe në rastin e Shqipërisë ku remitancat kanë një peshë të madhe ulja e tyre do të shkaktonte probleme ekonomike në vend"- tha drejtori i ONP-së për Europën Juglindore.

Drejtori i ILO, thotë se kriza në vendin tonë do të prekë dhe tregun e punës, duke dhënë sugjerimet për qeverinë shqiptare. "këtu duhet bërë një kujdes i veçantë për të zhvilluar skemat e kredisë dhe kreditë e dhëna për ekonomitë e vogla dhe ato të mesme do të bëjnë një rivitalizimi të jetës ekonomike dhe rritjen e vendeve të reja të punës"

Ndërkohë duhet kushtuar dhe një vëmendje të posaçme skemave asistenciale të qeverisë sepse në raste krizash shumë familje futen në rrethin e mbijetesës ndaj duhet që qeveria të marri masa të veçanta për ti bërë ballë kësaj situate.

Qeveria shqiptare ka pranuar deri tani se vendi do të vuaj efektet e krizës globale në ekonomi, por jo faktin se ne jemi në krizë. Megjithatë ekzekutivi ka deklaruar se ka marrë masat për përballimin e këtyre efekteve dhe se me këto ritme rritje ekonomike për tre muajt e parë të vitit pritet të jetë 4 deri në 5 për qind.

(burimi-balkanweb)