Ushtria 'rimerr' nën kontroll qytetin

[eugjeni]

Ushtria 'rimerr' nën kontroll qytetin


Luftimet kanë zhvendosur mbi 1 milionë vetë.
Ushtria në Pakistan thotë se ka rimarrë nën kontroll nga talebanët pjesën më të mirë të qytetit më të madh në Luginën Swat.
Zëdhënësi i ushtrisë, gjen. Major Athar Abbas, tha se qendra e qytetit të Mingorës ishte tashmë në duart e ushtrisë, por trupat po ndesheshin me rezistencë në periferi.

Pritet që ushtrisë t'i duhen dhe disa ditë për ta deklaruar qytetin të sigurt.

Ushtria pakistaneze nisi një ofensivë masive kundër talebanëve në Luginën Swat dhe në rajonin përreth disa javë më parë.

Një milionë banorë të zonës janë detyruar të braktisin shtëpitë e tyre për shkak të luftimeve.

'Fitore e rëndësishme'

Një muaj më parë ushtria pakistaneze nisi ofensivën e madhe në Luginën Swat dhe në zonat përreth për të dëbuar prej andej militantët talebanë që i kishin vendosur nën kontroll.

Kur ata hynë në Mingora, njoftohet se forcat ushtarake u përfshinë në luftime trup me trup me talebanët.

Një korrespondent i BBC-së thotë se për këtë arsye, njoftimi se qendra e qytetit ka rënë tani në duart e ushtrisë, do të konsiderohet si një fitore e rëndësishme.

Megjithatë, kjo fitore e forcave pakistaneze është arritur me një çmim.

Ofensiva ka çuar në zhvendosjen e mbi 1 milionë civilëve nga rajoni dhe organizatat humanitare kanë shprehur vazhdimisht shqetësim për pasojat e luftimeve mbi popullatën civile.