Pranga të shumëkërkuarit fierak, i dënuar për dy vrasje

[aurel]

Një i shumëkërkuar për vrasje nga policia është vënë në prangat e policisë sot në Fier. Forcat speciale të RENEA kanë vënë në pranga shtetasin Selami Hasani, 43 vjeç lindur e banues në Fier, i dënuar nga Gjykata e Krimeve të Rënda me 25 vjet burg për dy vrasje të kryera në vitin 2004.
Selami Hasani mori në mungesë dënimin për vrasje. RENEA në banesën e Hasanit gjeti dhe sekuestroi ne cilësinë e provës materiale dy pistoleta. Operacioni për kapjen e Hasanit u zhvillua pas muaj të tërë përgjimesh, ku policia u sigurua për vendndodhjen e saktë të tij.

Selami Hasani konsiderohej një ndër personat e rrezikshëm në Fier për lidhjet që ka patur me të fortin tjetër fierak Arben Isufaj i njohur ndryshe si Ben Qimja, e më pas për konfliktet me të, pas prishjes së pazareve.

Hasani u dënua me 25 vjet burg për vrasjen e nipit të Ben Qimes, Julian Isufi dhe e një kampisti, ky i fundit mbeti i vrarë rastësisht gjatë një shkëmbimi armësh në Fier mes bandës së Hasanit dhe Isufajve.