Shuhen zjarret në Greqi, bilanci i dëmeve katastrofik

[aurel]

Shuhen gjithë zjarret në Greqi, pas një angazhimi masiv të zjarrfikësve dhe gjithë banorëve të zonave të prekura.
Sipas informacioneve të marra sot herët nga zyrtarët e zjarrfikësve në Athine, theksohet se situata është nën kontroll edhe në pjesët e tjera të vendit.

Kjo do të thotë se rreth 90 zjarre të cilat ishin aktive një ditë më parë, tashmë janë shuar, përfshi gjithë vatrat e zjarrit në kryeqytet por edhe në ishujt Evia e Zakinthos.

Autoritetet greke kanë thënë se sot nuk ka asnjë vatër zjarri aktive, dhe fatmirësisht nuk ka dhe erëra të forta, që kanë favorizuar ditët e mëparshme zjarret.

Zjarret në Greqi shkrumbuan që nga dita e premte e javës se shkuar mijera hektarë tokë, qindra shtëpi, pyje e kullota, ferma dhe vende të shenjta duke shkaktuar një katastrofë ekologjike.

Mijëra hektarë tokë e pyje janë kthyer në toka djerrë. Në zonën e Atikës, zjarret që filluan ditën e premte të javës së kaluar, kanë djegur më shumë se 150 hektarë pyje dhe mbi 200 banesa.

Fatmirësisht në këto zjarre nuk u shkaktua asnjë viktimë, fale përgjigjes në kohë të autoriteteve për të evakuuar gjithë banoret nga zonat e rrezikuara.

Zëdhënësi i qeverisë tha se bilanci i dëmtimeve do të bëhet vetëm pasi zjarret të shuhen përfundimisht.

Dy vite më parë Greqia u përshi nga zjarret me vdekjeprurëse në historinë e saj, të cilat shkaktuan rreth 70 viktima.