Shqipëri: Gripi i derrave, shkon në 31 numri i të prekurve

[aurel]

Një Shqipëri konfirmohen 31 raste të prekurish nga gripi i derrave. Më i fundit ishte një i ri nga Kamza i cili ka qenë i shtruar në spitalin Infektiv të QSUT-së, por tashmë shëndeti i tij është përmirësuar.
Drejtori i ISHP-së, Alban Ylli tha të premten se listës së të prekurve i shtohet një rast i ri. Konfirmimi u bë pas mbërritjes së rezultateve nga laboratori i Rumanisë.

Ky rast konfirmoi dyshimet e mjekëve që me shqetësim thonë se numri i të prekurve nga virusi i gripit të derrave është shumë më i lartë se rastet e konfirmuara zyrtarisht. Për këtë arsye specialistët tërheqin vëmendjen për higjienë personale.

Sipas tyre është e vërtetuar tashmë që larja e duarve sa më shpesh me ujë dhe me sapun e pakëson mundësinë e përhapjes së virusit me disa 20-30 herë.

Lidhur me rastin më të fundit të prekur nga gripi i derrave mjekët shtojnë se ai ishte në gjendje relativisht të rëndë dhe pas dyshimeve u trajtua me Tamiflu.

Dyshimet e mjekëve u vërtetuan nga Laboratori i Bukureshtit, përgjigjet e të cilit erdhën disa ditë pasi pacienti kishte lënë spitalin. Mjekët thonë se gripi i derrave rrezikon të kthehet në pandemi me ardhjen e stinës së vjeshtës pasi i ftohti ndikon në përhapjen e tij.

[MAJDI]