Marihuana kultivohet në mes të qytetit të Shkupit

[aurel]

92 kilogramë marihuanë e cilësisë së lartë dhe 69 rrënjë të kësaj bime janë sekuestruar të shtunën në qendër të Shkupit në shtëpinë e Musli Xheladinit.
Autoritetet policore pranuan se e veçanta e këtij rasti, ishte se rrënjët e marihuanën nuk ishin mbjellë diku në bjeshkë, por në një serë në oborrin e Xhelatidit, rreth 100 metra larg stacionit policor të Bit Pazarit.

"Gjatë bastisjes së shtëpisë dhe oborrit të personit nga Shkupi për të cilin ekzistonin indikacione se në qendër të qytetit kultivonte marihuanë, u sekuestruan 92 kg marihuanë e cila ishte gati për shitje dhe 69 rrënjë marihuanë, të larta rreth 2 metra. I arrestuari, e kishte mbjellë bimën narkotike gjatë periudhës së pranverës dhe verës, në oborrin e shtëpisë së tij, ku kishte ngritur edhe sera për rritje sa më të shpejt të marihuanës", tregoi Ivo Kotevski, zëdhënës i MPB-së.

Ndërkohë uniformat blu, në një operacion paralel arrestuan edhe Shefki Ajetin, të cilit iu gjetën rreth 60 gram kokainë, 1,3 kg marihuanë si dhe farë për marihuanë, për tu mbjellë.
"Gjatë operacionit tjetër u arrestua një qytetarë tjetër gjithashtu nga Shkupi, për të cilin dyshohej se merret me tregtim të palejuar me lëndë narkotike, gjegjësisht me kokainë, të cilën ai ua ka shitur atë, të varurve nga droga nëpër klubet e natës dhe diskotekat e kryeqytetit", bëri të ditur Kotevski.

Nga MPB njoftojnë se të dy personat e arrestuar ishin të njohur për policinë. Ata kanë qenë ndaluar më parë, për vepra penale si kërcënime, vjedhje të ndryshme dhe plaçkitje.