Protesta për hapjen e kutive, Rama: Te drejten, cdo shesh

[Erlindi]

Nën parrullat “Ku është vota ime” apo “Hapni Kutitë e votimit” është zhvilluar protesta e PS, pikërisht në vendin ku u përmbyll edhe fushata zgjedhore

Qytetarë të shumtë, nëntë parti politike e shoqata të ndryshme në vend, i janë bashkuar protestës së Partisë Socialiste kundër asaj që cilësohet grabitje e votave të 28 qershorit. Nën parrullat “Ku është vota ime” apo “Hapni Kutitë e votimit” është zhvilluar protesta e PS, pikërisht në vendin ku u përmbyll edhe fushata zgjedhore. “Sot fillon protesta jonë që nuk mbaron pa fituar lirinë e të drejtës së votës sonë” e nisi fjalën e tij kreu socialist Edi Rama.

Rama : Vala e protestës do përhapet mbi Shqipëri

“Sot fillon protesta jonë që nuk mbaron pa fituar lirinë e së drejtës së votës sonë” kështu e nisi fjalën e tij kreu socialist Edi Rama, përpara qytetarëve të shumtë të pranishëm në Bulevardin “Dëshmorët e Kombit”, ndërsa theksoi se vala e protestës do të përhapet në të gjithë vendin. Duke e konsideruar protestën e sotme si të drejtë të cdo shqiptari që kërkon të ngrihet në këmbë, kur sipas tij “ligji shkelet me këmbë”, Rama theksoi se pushteti i qeverisë nuk vendos dot për qytetarët , kur shumica e shqiptarëve nuk ka vendosur për të.

“Ne duam të shohim votën tonë, duam të clirojmë votën tonë nga presioni i shtetit të bërë njësh me pushtetin. Ky pushet nuk vendos dot për ne, sepse shumica e popullit nuk ka vendosur për të. Vala e protestës do të përhapet mbi Shqipëri, do ta përballim pushtetin e hajdutëve të votës me pushtetin e sovranit” u shpreh Rama.

Kryesocialisti ka ripërsëritur kërkesat e opozitës për hetimin e zgjedhjeve nga parlamenti, duke hapur kutitë e votimit, ndërsa nënvizoi se mohimi i kësaj kërkese është provë e frikës së qeverisë. “Zgjedhjet dhe cdo element i paligjshëm të hetohet nga parlamenti, në radhë të parë duke hapur kutitë e votimit në sytë e të gjithë shqiptarëve. Ne nuk hyjmë në parlamant për tu bërë bashkëfajtorë në mbylljen e rrugës për zgjedhje të lira në Shqipëri edhe për kushedi se sa vite të tjera” theksoi kreu socialist.

Ndërkohë, Rama e ka mbyllur fjalën e tij duke u bërë thirrje qytetarëve të firmosin projektligjin për ti adresuar parlamentit kërkesën për hetimin e zgjedhjeve të 28 qershorit. “Firmosni projektin e propozuar në bazë të Kushetetutës për të kërkuar hetimin e atyre zgjedhjeve që deformuan pabesisht vullnetin tuaj. Në cdo shesh e në cdo rrugë të Shqiëprisë ne nuk do të ndalemi në kërkimin e të drejtës sonë sepse e drejta jonë as nuk shitet e as nuk negociohet” deklaroi kryetari i Partisë Socialiste. Kjo nismë, që kërkon 20 mijë firma, con automatikisht kërkesën e opozitës në parlament pa qenë nevoja që në të të jenë të pranishëm edhe deputetët socialistë.

Veliaj: Sot kemi një mundësi për të bërë histori

“Ku është vota ime?” kështu e nisi fjalën e tij kreu i G99 Erjon Veliaj , ndërsa nënvizoi se opozita e di ku i ka votat, për këtë arsye kërkon hapjen e kutive të votimit. Ndërkohë që falënderoi të gjithë qytetarët e pranishëm në tubim, Veliaj u ka bërë thirrje të gjithë qytetarëve të bashkohen në atë që ai e quajti, ora e rezistencës qytetare.

“Ne besojmë se potenciali i këtij vendi është i parealizuar, besojmë se në 28 qershor nuk humbi opozita, por Shqipëria. Jam i sigurt qe ne nuk kemi humbur njëri tjetrin. Shqipëria e ndershme është ende në këmbë dhe do të rezitojë. Sot nuk fillon vetëm rezistenca qytetare por edhe solidarizimi qytetar. ” u shpreh Veliaj. Ndërkaq Veliaj u shpreh se opozita do ti tregojë të gjithë skeptikëve se këtë herë nuk do të dorëzohet deri në hapjen e kutive të votimit. Ndër të tjera , kreu i G99 ftoi qytetarët të bashkohen në aksionin e radhës të opozitës, kundër Televizionit Publik Shqipëtar.

Gjinushi: E vërteta në kutitë e pahapura, Berisha largohu!

Në fjalën e tij Skënder Gjinushi Kryerari I PSD-së ka përsëritur kërkesën e hapjes së kutive të votimit. “Të hapen kutitë e votimit, pasi duhet të vendosë populli dhe jo Sali gërdeci e Ilir floriri”, me këto epitete ka personalizuar ata që, sipas tij kanë vjedhur votën e shqiptarëve. Gjinushi ka kërkuar hapjen e kutive, “në emër të 770 mijë votave të majta dhe 35 mijë votave të djathta që janë hedhur për ikjen e Berishës”, por sipas tij, “ pas hapjes së kutive do bëhen 900 mijë vota të vjedhura”. Në 28 qershor nuk u vodhën partitë u vodh vota e popullit, shprehet Gjinushi, duke kërkuar përsëri hapjen e kutive. Sipas tij, hapja e kutive rikthen besimin e zgjedhësve.” Populli i majtë e i djathtë beson që Berisha është hajduti me i madh i votës së lire dhe Iliri matrapazi më i madh. Kush vjedh votën vjedh pensionet, gënjen minatorët, mjeket, mesuesit e ushtaraket.”, vijon fjala e Gjinushit. Pasi ka përmendur fakte të shumta të vjedhjes së votave, Gjinushi ka theksuar se e vërteta më e madhe gjendet ne kutitë e pahapura. “Kryefakti është brenda në kutitë e votimit…prandaj Berisha largohu”. Me këtë frazë ka mbyllur fjalën e tij Gjinushi.



Milo: Hapja e kutive, kauzë demokratike e të gjithë shqipatrëve

Gjatë fjalës së tij përpara qytetarëve të pranishëm në protestën e socialistëve kundër asaj që cilësohet si krim elektoral i 28 qershorit, kreu i PSD-së, Paskal Milo nënvizoi se tubimi i sotëm ka si synim një cështje thelbësore që ka të bëjë me të ardhmen dhe demokracinë e Shqipërisë, për votën e lirë dhe për mbrojtjen e saj.

“Ky duhet të ishte një tubim për të gjithë qytetarët pa dallim bindje politike sepse vjedhja e votës është kthyer në një murtaje” u shpreh Milo. Ndër të tjera kreu i PSD theksoi se këtë vit të gjitha partitë u futën në zgjedhje me shpresën se një vend anëtar i NATO-s dhe aspirant për tu integruar në BE do ti jepte fund historisë së mashtrimeve elektorale të së kaluarës, por kjo, sipas Milos, nuk u arrrit as këtë herë. NATO nuk mund të na mbrojë nga hajdutët e votave, nuk mund të mbrojë lirinë e votës. NATO nuk mund të dërgonte ushtarët për të numëruar votat apo për të administruar procesin” theksoi Milo. Ndërkohë Milo nënvizoi se hapja e kutive të votimit duhet të bëhet jo vetëm ëpr të ndryshuar disa emra e numra por hapja e kutive është një kauzë demokratike që duhet të jetë e të gjithë shqiptarëve.



Legisi: Të hapen kutitë për ti dhënë fund krimit elektoral

“Jemi këtu për të mos tradhtuar votat e majta, për ti kujtuar shqiptarëve se ishim të sinqertë kur u ngritëm kundër Sali gërdecit”, ishin këto fjalët e para të anetarit të kryesisë së LSI, Nder Legisi, bashkuar protestës së opozitës në bulevardin “Dëshmorët e Kombit”. Legisi ka kërkuar hapjen e kutive të votimit, për ti dhënë fund krimit elektoral, për ti dhënë fund tragjedisë së Gërdecit. “Sali Berisha me bandën e tij është përgjegjesi kryesor i tragjedisë së Gërdecit. Ne besojmë se banda e Gerdecit duhet vënë para drejtësisë”. Legisi e ka mbyllur fjalën e tij duke thënë, ‘Nuk duam të ndajmë copat e pushtetit, duam të mbrojmë votat! E drejta është me ne, ne së bashku do të fitojmë!”



Majko: Nuk ka demokraci me kuti të mbyllura

“Nuk ka gjë më të mirë për një opozitë se sa të fillojë kauzën e saj si opozitë e vendit përmes kërkimit të një të drejte”. Kështu u shpreh anëtari i kryesisë socialiste, Pandeli Majko teksa hapi siparin e protestës së parë të socialsitëve kudër asaj që ata e quajnë “krimi elektoral të 28 qershorit. Pa u hapur kutitë nuk do të ketë demokraci në Shqipëri, nuk ka demokraci me kuti të mbyllura”, u shpreh Majko.

Burimi:ikubinfo.com