Marrëveshja me Greqinë, Meta: I gabuar, vendimi i PS

[aurel]

Zv/kryeministri dhe ministri i Punëve të Jashtme të Shqipërisë e konsideroi si të gabuar vendimin e PS-së dhe të partive të tjera opozitare për të ankimuar në Gjykatën Kushtetuese marrëveshjen për kufijtë detar me Greqinë.
Në një prononcim për mediat, Meta tha se, “shpreh keqardhjen sepse nuk është kjo mënyra për një forcë politike për të vepruar në mënyrë të instrumetalizuar, aq më tepër kur kemi të bëjmë me një çështje politike serioze”.

“Unë e mirëpres Ramën edhe në Ministrinë e Jashtme ku ai mund të takohet me të gjithë ekspertët që janë marrë me këtë çështje,- pohoi Meta - duke shtuar se, "është e drejtë e tij të veprojë për të ndërmarrë nisma të tilla”.

Të enjten Partia Socialiste dhe disa parti të tjera të vogla, të majta dhe të djathta, nënshkruan një marrëveshje për të ankimuar javën e ardhshme në Gjykatën Kushtetuese marrëveshjen detare mes Greqisë dhe Shqipërisë.

Ky projektligj ndërkaq pritet të shqyrtohet në Kuvend, por vetëm dje u mësua se në agjendën 3 javore ratifikimi i marrëveshjes nuk ekzistonte. Ndërkohë nga Kuvendi nuk bëhet i ditur se kur do të ratifikohet marrëveshja e përcaktimit të kufirit detar mes dy vendeve, Shqipërisë dhe Greqisë.