CNN: Shqipëria dhe India përplasen për Nënë Terezën

[aurel]

“Nga gjaku unë jam shqiptare, shtetase indiane, nga besimi katolike, por për ata që kërkojnë ndihmën time unë i përkas botës”, ka thënë Nënë Tereza në para shumë vitesh.
Televizioni prestigjioz amerikan, CNN i ka dhënë një hapësire të madhe çështjes së kthimit të eshtrave të Nënë Terezës në vendin ku ajo u lind. Sipas faqes së CNN në internet, Qeveria shqiptare dhe ajo indiane po përplasen për ketë çështje, pasi Tirana dëshiron ta kthejë në atdhe humanisten e madhe me rastin e 100 vjetorit të lindjes vitin tjetër.

I cituar nga CNN, kryeministri Berisha shprehet se qeveria ka në plan hapjen e një muzeu për nder të Nënë Terezës, por ai thekson se më e rëndësishme është që Gonxhe Bojaxhiu të prehet pranë eshtrave të mamasë dhe motrës së saj në Tiranë.

“Atë e merrte malli për familjen e saj. Ajo lutej përditë për familjen dhe vendin e saj. Dy qeveritë tona duhet të diskutojnë për këtë çështje në mënyrë që të gjendet një zgjidhje”, thotë Berisha i cituar nga CNN.

Nga ana tjetër, India, vendi ku Nënë Tereza kaloi pjesën më të madhe të jetës, nuk pranon të zhvarrosë eshtrat e humanitares.

“Nënë Tereza ishte një shtetase indiane”, ka thënë zëdhënësi i ministrisë së Jashtme, Vishnu Prakash.