Bush shpall pavarësinë e Kosovës

[ReniX]

Bush shpall pavarësinë e Kosovës

Qeveria merr edhe "kritika": S‘keni arritur ende standardet për në NATO, duhen më shumë reforma


Xhorxh Bush, Presidenti i Shteteve të Bashkuara të Amerikës, pasi ka përshëndetur të gjithë shqiptarët në gjuhën e tyre me një "Mirëdita" të pastër, ka "shpallur" pavarësinë e Kosovës, nga kryeqendra e shtetit shqiptar, Tirana. Pikërisht, më 10 qershor, në përvjetorin e Lidhjes së Prizrenit, kur u shpall shteti autonom shqiptar nga perandoria osmane, nga oborri i selisë së qeverisë së Shqipërisë, Presidenti i SHBA-së, Bush, ka folur qartë dhe prerë: "Është koha që Kosova të marrë pavarësinë dhe kjo do të arrihet me çdo kusht". Në konferencën e përbashkët për shtyp me Kryeministrin Sali Berisha, kreu i Shtëpisë së Bardhë ka përforcuar mesazhin që dha një ditë më parë në Romë, duke i siguruar krerët e shqiptarëve të Kosovës, se Amerika jo vetëm nuk i ka braktisur ata, por e ka vendosur madje edhe rrugën e veprimeve të mëtejshme për zgjidhjen përfundimtare të statusit të Kosovës. "Ne do të punojmë me diplomatët rusë dhe të BE-së për të gjetur një zgjidhje (për Kosovën). Nëse kjo nuk do të ndodhë, atëherë ne do të themi: Mjaft, Kosova do të jetë e pavarur!". Kështu deklaroi Presidenti i SHBA—së, i cili pothuajse të gjithë konferencën për shtyp e fokusoi pikërisht me kryeçështjen e momentit për të gjithë diplomacinë botërore, Kosovën. Presidenti Bush theksoi dje se Uashingtoni do të punojë diplomatikisht për këtë çështje për të bindur Moskën, si dhe për të rakorduar qëndrimet me Bashkimin Evropian. Kreu i Shtëpisë së Bardhë e theksoi jo vetëm një herë që vendet e BE-së tashmë janë afruar shumë me Uashingtonit, sepse ata përkrahin planin "Ahtisaari", i cili parashikon pavarësi të mbikëqyrur për Kosovën. Që do të thotë se puna bindëse e diplomacisë "sekrete" do të jetë pikërisht me Moskën. Por Presidenti i Shteteve të Bashkuara e bëri shumë të qartë se Amerika nuk do të presë shumë. Në ditët e para të muajit të ardhshëm, Presidenti Bush do të takohet me kreun e Kremlinit, Vladimir Putin, në shtëpinë e prindërve të tij në qytetin Kennebunkport, në verilindje të SHBA-së, për të bërë tentativën e fundit që ta bindë Rusinë që të votojë pro pavarësisë së Kosovës. Por nëse Moska nuk do ta pranojë sërish ofertën e Uashingtonit, Presidenti Bush e bëri të qartë se nuk do të pritet asnjë sekondë. Kosova do të shpallet si htet i pavarur dhe Shtetet e Bashkuara të Amerikës do të jenë vendi i parë që do ta njohë këtë pavarësi. Qëndrimin zyrtar Presidenti Bush e ka bërë të ditur dje nga Tirana dhe kjo nuk ishte e rastësishme. Një axhendë e Uashingtonit që nis shumë herët, kur SHBA kundërshton heqjen e autonomisë së Kosovës nga Millosheviçi dhe arrin kulmin në luftën e NATO-s nën udhëheqjen e SHBA-së dhe Presidentit të atëhershëm, Bill Klinton, që solli çlirimin e Kosovës nga zgjedha e Millosheviçit dhe heqjen e të drejtës së Beogradit për të qeverisur Kosovën, ku jetojnë më se 90% shqiptarë. Deklarata e djeshme e Presidentit Bush në Tiranë zbuloi dhe thelbin e vizitës së parë të një Presidenti amerikan në Shqipëri. Vizitë që në qendër të saj kishte "shpalljen" politike të pavarësisë së Kosovës. Një qëndrim politik javën e fundit nisi në qytetin verilindor të Gjermanisë, Heiligendamm, ku u mbajt samiti i liderëve të tetë vendeve më të industrializuara të botës, u përforcua në Romë dhe iu vu vula dje në mesditë në kryeqytetin shqiptar, Tiranë. Por Presidenti i SHBA i ka bërë thirrje liderëve të Kosovës, që të jenë të duruar dhe të respektojnë të gjitha standardet e kërkuara. Një ftesë për qetësi, e cila erdhi pas një sinjali të Prishtinës për humbjen e durimit.

[ReniX]

Bush: Nuk janë plotësuar standardet për në NATO


Shefi i Shtëpisë së Bardhë, Xhorxh Bush, ka përcjellë mesazhin e Uashingtonit në Tiranë, se Shqipëria duhet të vazhdojë më tej reformat për t‘u anëtarësuar në NATO. Dje, në kryeqytetin shqiptar është dhënë një sinjal i fuqishëm për anëtarësimin e Shqipërisë në strukturat e NATO-s, megjithëse gjithmonë ky sinjal ka mbrapa tij një "por", çka nënkupton se duhet bërë më shumë për t‘i gjetur dyert e NATO-s të hapura në samitin e 2008-ës, i cili do të zhvillohet në kryeqytetin rumun, Bukuresht. Për këtë duhet të përgjigjet politika, e cila duhet të bashkëpunojë për të çuar vendin drejt rrugës së integrimit. "Shqipëria ka nevojë për reformat politike dhe ato ushtarake", është shprehur Presidenti Bush, i cili ka theksuar se SHBA-ja mbështet anëtarësimin, por që në këtë drejtim duhet të plotësohen standardet e kërkuara. Lidhur me aspiratat e Shqipërisë për t‘u bërë pjesë e NATO-s, Presidenti amerikan ka përgëzuar Kryeministrin Berisha për reformat që ka ndërmarrë në kuadër të reformimit të forcave të mbrojtjes. "Shpreha dëshirën time të thellë që Shqipëria të hyjë në NATO dhe unë jam përkrahës i kësaj dëshire", tha Presidenti Bush. Sipas tij, duhet të ketë reforma të tjera politike e ushtarake dhe duhet të bëhet më shumë për të eliminuar korrupsionin. Në këtë aspekt, Presidenti i SHBA-së vuri në dukje se ka marrë garancinë e plotë të Kryeministrit Berisha, si dhe përkushtimin për t‘i arritur këto standarde. "Është shumë e rëndësishme për lirinë e këtij vendi që të kuptoni se politikanët duhet të punojnë së bashku për të arritur këto standarde, pra duhet t‘i lini mënjanë diferencat politike dhe të përqendroheni në përparësitë e shqiptarëve", tha Presidenti amerikan. Vizita e Presidentit më të fuqishëm të botës, në një vend të vogël si Shqipëria, do të thotë shumë për Shqipërinë. Nëse duam të hyjmë në NATO, mesazhi i Presidentit Bush ishte më shumë se i qartë: "Duhet të arrihen standardet". "U bëj thirrje gjithë politikanëve në Shqipëri, duke përfshirë edhe opozitën, që të marrin të gjitha hapat e duhura për të ndihmuar Shqipërinë për të hyrë në NATO", tha Presidenti Bush. "Jam shumë i impresionuar me dëshirën e qeverisë për të luftuar korrupsionin dhe për të dhënë mesazhin e qartë se qeveria vjen nga populli dhe ka besimin e popullit", tha shefi i Shtëpisë së Bardhë. Gjithashtu, Presidenti i SHBA-së ka deklaruar se është i lumtur që Shqipëria ka një tolerancë fetare dhe që është një nga aleatet më të forta të Amerikës. "Ndaj dhe sot unë dua t‘i jap një mesazh popullit shqiptar, që ju të shpresoni për përkrahjen e Amerikës", vijoi ai. Presidenti amerikan e ka cilësuar Shqipërinë si një vend që ka hedhur poshtë prangat e shoqërisë shtypëse.

[ReniX]

Historiku për NATO-n

Integrimi në NATO i Shqipërisë, Kroacisë dhe Maqedonisë ishte një nga arsyet e shumta përse Presidenti amerikan, Xhorxh Bush, vizitoi Shqipërinë dhe takoi në Tiranë kryeministrat e tri vendeve. Historiku i mbështetjes së Presidentit Bush për tri vendet e Ballkanit filloi katër vjet më parë, kur Shqipëria, Kroacia e Maqedonia firmosën në Tiranë dokumentin e bashkëpunimit rajonal për t‘u bërë në të ardhmen anëtare të Aleancës së Atlantikut të Veriut. Dokumenti njihet si "Karta Adriatik 3" dhe u firmos duke pasur si garant për arritjen e këtij qëllimi Shtetet e Bashkuara të Amerikës. Më 2 maj 2003, "Karta Adriatik 3" u firmos në Tiranë nga sekretari amerikan i Shtetit, Kolin Pauell, ministri i Jashtëm i Shqipërisë në atë kohë, Ilir Meta, ministri i Jashtëm kroat, Antonio Pikula, dhe ministrja e Jashtme maqedonase, Ilenka Mitreva. Atëherë Presidenti Bush e mirëpriti nismën e Adriatikut si një kontribut të fortë drejt vizionit të tij për një Evropë të plotë, të lirë dhe në paqe, duke theksuar mbështetjen e Shteteve të Bashkuara të Amerikës për "Derën e Hapur" të Aleancës dhe duke vënë në dukje synimin e integrimit të plotë të Shqipërisë, Kroacisë e Maqedonisë në institucionet euroatlantike. Këtë mesazh përcolli më 2 maj 2003 në Tiranë edhe sekretari i Shtetit, Kolin Pauell. Karta e Adriatikut ka tri angazhime kryesore: ndihmën e Shteteve të Bashkuara për tri vendet për zbatimin e reformave të nevojshme, ku theksohet se çdo vend aspirant do të gjykohet në mënyrë individuale në lidhje me përparimin e tij drejt përmbushjes së standardeve për anëtarësim në NATO; përkushtimin e përbashkët politik të palëve për të forcuar institucionet demokratike, shoqërinë civile, sundimin e ligjit, ekonomitë e tregut, si edhe ushtri që përputhen me NATO-n për të luftuar korrupsionin dhe krimin; si edhe për të ruajtur të drejtat e njeriut dhe liritë civile për të gjithë qytetarët e Shqipërisë, Kroacisë, Maqedonisë dhe vendeve të tjera të Evropës Juglindore.

[ingal]

ISHALLAH NUK BEHET LUFTE...
SE RUSIA DHE SERBIA JANE KOKEFORTE, SE BESOJ SE DO TE BIEN DAKORT.

[anakonda]

ishalla genti23 po ashtu bushi ka me shpall pavarsin e kosoves

[B|1n1]

urrrrrrrrrrrrrrrrrrrraaaaaaaaaaaaaaaaaaaaaaaaaaaaa aaaa na erdhi pavarsia e kosoves