Berisha: Gati të heqim imunitetin

[aurel]

Kryeministri i Shqipërisë, Sali Berisha nuk ka shfaqur asnjë rezervë në gatishmërinë e mazhorancës që drejton për të hequr imunitetet për çdo deputet, ku ai akuzohet për korrupsion.
Berisha iu përgjigj gazetareve një ditë pasi ambasadori amerikan John Withers ngriti serish shqetësimin e Washingtonit për domosdoshmërinë e kufizimit të imuniteteve, një çështje që ngrihet edhe në progres raportin e Komisionit Evropian për Shqipërinë.

"Ne jemi kundër çdo imuniteti. Kemi dërguar ligjin në Parlament dhe opozita nuk e votoi. Atëherë do të praktikohet një qëndrim i njëanshem, ku çdo kërkesë nga organet e drejtësisë për heqje imuniteti, do të jetë e pranueshme", u shpreh Berisha.

Pak më herët Partia Socialiste identifikoi si të korruptuar qeverisjen e kryeministrit Berisha dhe i kërkoi atij heqjen e imunitetit te ministrave Basha dhe Mediu.

“Ka ardhur koha që qeveria t’i bindet ligjit, të dorëzojë dy ministrat e tij dhe të marrë masa të menjëhershme duke nisur nga vetja, familjarët dhe shërbëtorët e oborrit”, tha deputeti socialist, Sajmir Tahiri.

Për të hequr imunitetin e një deputeti apo ministri duhet më parë një kërkesë nga prokuroria, ndërsa për të zhveshur të gjithë deputetët dhe ministrat nga imuniteti për çështjet e korrupsionit, duhet ndryshimi i ligjit me 84 vota sipas propozimit të komisionit të Venecias ose ndryshimi i Kushtetutës, siç thotë Partia Socialiste me 94 vota në Parlament, nga 74 që ka mazhoranca.

Me këto vota kryeministri Berisha tha se do të përserisë heqjen e imunitetit për këdo që kërkon prokuroria. “Mazhoranca ka të drejte të mos i njohë vetës imunitet. Edhe pse nuk ndryshon dot ligjin, mund të mbajë qëndrim të njëanshem për këtë çështje”, tha Berisha.