Gazetarët, 10 mijë euro për gjetjen e Taçit

[aurel]

Shoqatat e gazetarëve, në një reagim pas deklaratës së Rezart Taçit, shprehen se ofrojnë një shpërblim prej 10 mijë eurosh për cilindo person që jep informacion mbi vendodhjen e Rezart Taçit, i cili është shpallur nga policia si person në kërkim.
“Shoqatat ndihmojnë kështu forcat e rendit që ky kriminel të vihet sa më shpejt përpara drejtësisë, në një kohë kur Rezart Taçi shpërndan përmes zëdhënësit të tij, deklarata false duke e mohuar paturpësisht dhunimin e gazetarit Mero Baze”, thuhet në deklaratën e shoqatave të gazetarëve shqiptarë.

Me tej, në të theksohet se “ndërsa i shpalluri në kërkim Rezart Taçi dërgon komunikata për median, prokuroria ende nuk ka marrë në pyetje as zëdhënësin e tij, për të mësuar vendin se ku ndodhet biznesmeni i akuzuar”.

Shoqatat e gazetarëve u bëjnë thirrje gjithashtu të gjithë qytetarëve të angazhuar të dalin në një protestë paqësore të mërkurën në ora 12:00, përpara godinës së kryeministrisë.