Familjarët e “Gërdecit” çojnë dosjen në Strasburg

[aurel]

Familjarët e viktimave të tragjedisë së 15 marsit 2008, kanë vendosur të padisin Shqipërinë në Gjykatën Ndërkombëtare për të Drejtat e Njeriut.
Zamira Durda, nëna e 6-vjeçarit Edison Durda, i cili gjeti vdekjen gjatë shpërthimit tragjik të fabrikës së demontimit të municioneve në Gërdec, i është drejtuar me një letër Gjykatës së Strasburgut.

Në emër të trashëgimtarëve ligjorë të 26 viktimave, aplikuesja Durda i kërkon gjykatës pajisjen me kopje të formularit përkatës dhe të numrit për dosjen (Çështja Durda etj. kundër Shqipërisë).

Zamira Durda, e cila nuk ka reshtur në ecejaket e saj për të parë në qeli “vrasësit” e të birit, i shkruan Strasburgut se gjykatat shqiptare u kanë mohuar të drejtën për një proces të rregullt ligjor, për faktin se nuk i kanë legjitimuar si palë në procesin penal ndaj të akuzuarve si përgjegjës për tragjedinë.

Për tragjedinë e Gërdecit janë 29 të pandehur ndaj të cilëve vazhdon procesi gjyqësor në Gjykatën e Tiranës. Mihal Delijorgji, administratori i fabrikës së demontimit të municioneve e cila shpërtheu më 15 mars, ish-kreu i MEICO-s, Ylli Pinari, Dritan Minxolli, drejtori teknik i fabrikës së vdekjes; Juliana Margariti, ekonomiste e ndërmarrjes MEICO, si dhe shoqëria “Alba Demil” sh.p.k, kanë kërkuar të gjykohen me procedurë të përshpejtuar në gjendjen që janë aktet, pa kërkuar asnjë provë tjetër.

Duket se në këtë mënyrë të pandehurit, Delijorgji, Pinari dhe Minxolli të akuzuar për vrasje masive, po tentojnë t’i shpëtojnë burgimit të përjetshëm, nëse gjykata i cilëson fajtorë për ngjarjen tragjike të 15 marsit 2008.

Lidhur me këtë kërkesë, trupi gjykues i kryesuar nga Ridvan Hado do të shprehet seancën e radhës.