Të paditurit e procesit Gërdeci akuzojnë Mediun

[aurel]

Ish ushtarakë të lartë të ministrisë së mbrojtjes në Shqipëri kanë bërë përgjegjës ish ministrin e mbrojtjes Fatmir Mediu për tragjedinë e ndodhur në Gërdec më 15 mars të vitit 2008.
Nga shpërthimi i një impianti çarmatimi atje, 26 persona humbën jetën dhe 300 u plagosën.

Në procesin gjyqësor që po zhvillohet në Tiranë është kërkuar thirrja e Mediut dhe disa ministrave të tjerë në cilësinë e dëshmitarëve.

Ka qenë ish shefi i shtabit të përgjithshëm të ushtrisë shqiptare, Luan Hoxha që nëpërmjet avokatit të tij ka shkarkuar gjithë përgjegjësinë për tragjedinë tek ish ministri i Mbrojtjes, Mediu.

Avokati i Hoxhës tha në seancën gjyqësore se përzgjedhja e vendit ku do të ndërtohej impianti i çarmatimit, transporti i predhave nga ushtria si dhe ruajtja e ambienteve të kompanisë private, është bërë me urdhër të drejtpërdrejtë nga ish ministri Mediu.

Avokati i ish shefit të shtabit të përgjithshëm të ushtrisë tha gjithashtu se disa urdhra për këtë çështje ishin dhënë nga ministri Mediu pa dijeninë e Hoxhës.

Ish ministri i mbrojtjes, Fatmir Mediu ishte zyrtari më i lartë, ndër 29 zyrtarë të implikuar i cili u akuzua nga prokuroria për shpërdorim detyre në lidhje me tragjedinë e Gërdecit.

Fillimi i procesit një vit pas tragjedisë u shty disa herë deri sa me fillimin e tij gjykata vlerësoi se Mediu, tashmë deputet në parlamentin shqiptar pas zgjedhjeve të 28 qershorit, gëzonte imunitet, ndaj dhe ndjekja penale ndaj tij ndërpritej.

Megjithatë, vetë Mediu dhe përfaqësues të tjerë të mazhorancës thonë se janë të gatshëm të japin shpjegime në lidhje me ngjarjen.