Opozita, të premten nis vala e protestave

[aurel]

Të premten, opozita në Shqipëri do të nisë një valë protestash për të kërkuar fillimisht shkarkimin e drejtorit të përgjithshëm të TVSH-së dhe më pas për të rrëzuar kryeministrin Berisha.
Lajmin e bëri të ditur kryetari i G99, Erjon Veliaj, në përfundim të mbledhjes së kryetarit te PS Edi Rama, me aleatët e majtë dhe të djathtë që nuk përfaqësohen në Parlament.

“Nga dita e nesërme do të fillojë një protestë masive përpara TVSH-së, për të kërkuar shkarkimin e drejtorit. Më pas vala do të vazhdojë me nga një protestë në dite”, ka deklaruar Veliaj.

Kreu i G99 ka përdorur tonë të ashpra ndaj kryeministrit Berisha, të cilin e ka cilësuar një të sëmure mendor, që duhet të largohet sa më shpejt nga pushteti.

“Kemi një kryeministër pervers. Ai nuk është i afte mendërisht të qeverisë vendin e vet. Drejtohemi nga një kryeministër anormal, ndaj po marrim masa”, ka theksuar Veliaj.

Ndërsa kryetari i PBDNJ, Vangjel Dule, në fjalën e tij ka nënvizuar se hapja e kutive është një domosdoshmëri, ashtu si dhe zgjedhjet e parakohshme.

Ne të njëjtën linjë është shprehur edhe avokat Spartak Ngjela, i cili ka theksuar se, Shqipëria duhet të çlirohet nga tirania.

Ndërsa kryetari i PDK, Nard Ndoka, përveç se ka konfirmuar protestën ka kërkuar nga prokuroria që të hetojë vjedhjen e votave.