Berisha: Luftë ndaj mafias në vend

[aurel]

Kryeministri Sali Berisha e konkretizoi me vendim qeverie denoncimin e tij publik për atë që ai e ka cilësuar aferë me token publike në qendër të Tiranes. Ekzekutivi vendosi në mbrëmje anulimin e shitjes se 1350 metrave të kompleksit Tajvani, ndërsa kërkoi që të njëjtin vendim ta marrin edhe këshilltarët e këshillit bashkiak të Tiranës.
"Ç’bërjen e vendimit me të cilin është përvetësuar toka publike në zemër të Tiranës jashtë çdo lloj kompetence të këshillit bashkiak. 1350 metër katrorë tokë, siç është marr vesh janë përvetësuar me një çmim qesharak në një kohë kur toka nuk ka qenë private, në një kohë kur toka nuk ka qenë pronë e bashkisë së Tiranes, por tokë publike, pronë e shtetit për të cilën përgjegjëse direkte është qeveria qendrore", deklaroi kryeministri Berisha.

Berisha lexoi mesazhe që i kane mbërritur nga shumë qytetarë, të cilët sipas tij ndjehen të kërcënuar nga mafia e ndërtimit. Ndaj ai propozoi amendimin e Ligjit të Inspektoriatit të Ndërtimit dhe krijimin e një force të ndërhyrjes së shpejtë.

Me argumentin se mjetet lundruese janë industri e mafies në vend, kryeministri Sali Berisha propozoi që moratoriumi për ndalimin e skafeve të shtohet edhe më 3 vjet të tjera. Kjo masë, sipas Berishës, merret në kuadrin e luftës që ekzekutivi i ka shpallur mafies dhe krimit të organizuar, por se shumë shpejt shqiptarët do të lëvizin pa viza në zonën Schengen.