Gert Bogdani: Dasmën do ta nis në pub

[ardona]

Gert Bogdani: Dasmën do ta nis në pub

Një dasmë larg tradicionales! E tillë do të jetë ceremonia martesore e deputetit të Partisë Demokratike, Gert Bogdani. Pas një lidhjeje të gjatë të nisur që në bankat e gjimnazit, çifti simpatik Bogdani-Çepani vendosi më në fund të kurorëzojë me martesë dashurinë e tyre disavjeçare. Planet janë për tri festa të ndryshme. E para do të organizohet të premten me miqtë e tij demokratë, dhe në një vend çuditërisht të pashfrytëzuar kurrë më parë si një ambient dasme, siç është club-i i natës "Folie". A do të shkojë lideri i të djathtëve, kryeministri Sali Berisha në këtë vend, kjo ngelet për t'u parë. Megjithatë, ceremonia që do të mbahet në një kala në Jug të Shqipërisë do të jetë më zyrtare, e që do të vijohet të dielën me një darkë familjare.
Ceremonitë
Festa e së premtes në të cilën do të mblidhen bashkë të gjithë miqtë e çiftit, kolegët, njerëzit e medias etj, do të organizohet në klubin e njohur në qendër të kryeqytetit, "Folie". Menjëherë pas kësaj feste, çifti do të niset në një prej kalave në Jug të Shqipërisë, në të cilën dhe do të kryejnë ceremoninë e betimit. Ende nuk e dimë nëse pas kësaj ceremonie Edlira do të vijojë të mbajë mbiemrin e saj, apo të Gertit. Zëra të afërt me çiftin pohojnë se Edlira dëshiron të mbajë mbiemrin e saj, por kjo gjë mbetet ende për t'u parë. Të dielën do të organizohet ceremonia familjare, në të cilën do të jenë të ftuar të gjithë të afërmit e çiftit.
Të ftuarit
Përveç familjarëve dhe miqve të përbashkët të çiftit në mbarë botën, nuk do të mungojnë në ceremoninë martesore as emra të njohur të medias, përfaqësues të rinisë nga disa parti popullore në Europë, politikanë e deputetë të Partisë Demokratike. Jemi vënë në dijeni se i ftuar në këtë ceremoni është edhe kryeministri i vendit, Dr. Sali Berisha, por ende nuk dihet në është konfirmuar ose jo prezenca e tij në këtë ceremoni festive.
Veshjet
Fustanet e Edlirës janë të stiluara mjaft bukur nga një dizenjues italian. Janë dy fustane të thjeshta dhe shumë të fisshme, larg dantellave a xixave të tepruara, sepse të gjithë ata që e njohin, e dinë që Edlira më shumë se gjithçka vlerëson thjeshtësinë. Edhe Gerti do të ketë gjithashtu dy kostume, një për darkën e së premtes dhe një tjetër për ceremoninë e së shtunës.
Muaji i Mjaltit
Por, surprizat e Gertit nuk kanë të mbaruar. Ai ka menduar që muajin e mjaltit ta kalojnë në Kubë, vendi në të cilin edhe është rritur Edlira. Ky fakt e ka gëzuar pa masë Edlirën, pasi ajo do të rikthehet në vendin e fëmijërisë pas 13 vitesh. Ndërsa e pyesim në lidhje me këtë surprizë, ajo na përgjigjet: "Jam përfundimisht shumë e gëzuar. Gerti ka qenë, është dhe do të mbetet djali i surprizave". "Ai gjen gjithmonë një motiv për të më bërë të lumtur, për të më gëzuar, për të më kaluar stresin e ditëve të ngarkuara me punë", - përfundon drejtoresha simpatike e ASAN.
Gert, do të na tregosh ndonjë detaj special nga dasma e kësaj fundjave? Cilët do të jenë të ftuarit?
Do të ketë tri festa për dasmën tonë. E para do të realizohet të premten e 16 korrikut dhe në të do të jenë të ftuar miqtë tanë të përbashkët, deputetët e Partisë Demokratike, si dhe njerëz të medias.
Dasma do të jetë e bazuar në traditë?
Ceremonia do të përmbajë shumë pak elementë tradicionalë, do të jetë më shumë diçka moderne. Edhe ato pak elementë tradicionalë janë futur për shkak të të ftuarve nga jashtë, në mënyrë që t'i njohim dhe ata me traditat shqiptare.
Ku keni bërë në plan ta kaloni muajin e mjaltit?
Muajin e mjaltit kam menduar ta kalojmë në Kubë, vendin në të cilin dhe është rritur Edlira. Dëshiroj shumë që të njihem edhe unë me lagjen, rrugët, kulturën me të cilën është rritur Edlira. Veç kësaj mendova që t'i bëja dhe një surprizë Edlirës, pasi ajo kthehet në vendin e fëmijërisë pas 13 vitesh.
E keni blerë shtëpinë në të cilën do të jetoni pas dasmës?
Shtëpinë e kemi blerë dhe jemi në arredim e sipër, pasi është shumë e vështirë që të bësh shumë gjëra njëkohësisht.