Internet Explorer nuk po këndellet, sërish në rënie

[vaaldr1n]

Dikur Internet Explorer dominonte internetin por kohëve të fundit gjëra nuk po i shkojnë si duhet, dhe këtë gjë e konfirmoi sërish StatCounter që sot paraqiti një raport ku shihet se ueb shfletuesi i Microsoft ka pësuar një rënie të pjesëmarrjes në treg në nivel nën 50 për qind.

Internet Explorer tani ka pësuar rënie dhe tani renditet me një pjesëmarrje në treg prej 49.87 për qind të pjesëmarrjes globale të shfletuesve të internetit, gjë që është edhe hera e parë që ky shfletues po renditet me një pjesëmarrje nën 50 për qind.

Megjithëse shfletuesi i Microsoft mbetet platforma dominuese e shfletimit të internetit, rivalët si Google dhe Mozilla janë duke trokitur tek porta.

Sipas shifrave më të fundit nga StatCounter, ueb shfletuesi Mozilla i Firefox tani ka një pjesëmarrje në treg prej 31.5 për qind, kurse shfletuesi i Google, Chrome ka arritur në 11.54 për qind, që është një rritje mjaft e madhe në krahasim me 3.69 për qind sa ishte në shtator të vitit që shkoi.

“Padyshim që është një datë për tu shënuar në betejë e shfletuesve” tha Aodhan Cullen, shef ekzekutiv i StatCounter. “Vetëm para dy viteve, Internet Explorer dominoi tregun botor me një pjesëmarrje prej 67 për qind”.

Rënia e Internet Explorer në Evropë që tani është në 40.26 për qind (në krahasim me periudhën e njëjtë në vitin e kaluar kur ishte 46.44 për qind) thuhet se është si rrjedhojë e “Ballot box” të cilin Microsoft e ka ofruar tek përdoruesit e kompjuterëve në mënyrë që atyre të mos ju imponohet një shfletues por ata të kenë mundësinë për të zgjedhur cilindo që dëshirojnë. “Fajet” për këtë vendim i kishte Komisioni Evropian, por hairin i panë shumë prodhues alternativ të tregut si Firefox, Opera, Chrome, Safari, etj. /pcworld.al