Monstra i Korces, nje burre 84 vjec

**labja** · 15-08-2011, 11:48 AM

Pa kaluar 48 orë nga gjetja e kufomës së gruas së masakruar dhe hedhur në fushën e mbetjeve urbane në periferi të qytetit të Korçës, policia lokale ka identifikuar viktimën dhe ndaluar autorin e dyshuar të ngjarjes. Ky i fundit mësohet se është një i moshuar që bashkëjetonte prej kohësh me viktimën, e identifikuar si Liljana Arapi, 42 vjeçe. Burimet zyrtare të policisë lokale kanë bërë të ditur mbrëmjen e djeshme se, tashmë është zbardhur ngjarja makabre e dy ditëve më parë dhe është ndaluar 84-vjeçari Gaqo Dumka, si autor i dyshuar i vrasjes së Liljana Arapit. Mësohet se mes viktimës dhe autorit kishte një lidhje intime.

Ata jetonin së bashku prej kohësh në lagjen 4 të Korçës, në një banesë të marrë me qira. Viktima ishte nga Bilishti, e pamartuar dhe prej pesë vitesh jetonte me të moshuarin, i cili e prezantonte mes të njohurve si mbesën e tij. Burimet zyrtare të policisë së Korçës kanë dhënë detaje të ngjarjes makabre, që mësohet se ka ndodhur pasditen e datës 11 gusht, në ambientet e banesës së marrë me qira nga i moshuari me origjinë nga Drenova. Ky i fundit është ndaluar gjatë orëve të pasdites. Fillimisht ai është shoqëruar për të shmangur çdo lloj rezistence nga ana e tij dhe në orën 19:00 është arrestuar. Gjatë marrjes në pyetje ai ka pranuar krimin dhe ka deklaruar se e ka vrarë 42-vjeçaren, pasi dyshonte se ajo kishte krijuar lidhje me burra të tjerë.

Gaqo Dumka është shprehur se kishte si synim të kalonte vitet e pleqërisë me 42-vjeçaren dhe se nuk mund të duronte marrëdhëniet që ajo kishte krijuar me persona të tjerë. Gjatë kontrollit në shtëpinë ku banonte me qira 84-vjeçari Gaqo Dumka, policia ka gjetur dhe sekuestruar si prova materiale mjetet me të cilat ai kreu vrasjen: një sëpatë, dy thika, tesha të ndotur me gjakun e viktimës dhe të autorit, si dhe 2 aparate celulare që i përkisnin të moshuarit dhe 42-vjeçares. Ndërkaq, policia bëri të ditur se gjatë këqyrjes së banesës së të moshuarit janë vërejtur njolla gjaku në ambientet e brendshme dhe të jashtme, duke qartësuar kështu se masakrimi i gruas ka filluar që tek shtëpia ku ata bashkëjetonin. Policia tha se do të vazhdojë hetimet për zbardhjen e plotë të kësaj ngjarjeje, pas arrestimit të 84-vjeçarit të akuzuar “për vrasje në rrethana cilësuese”. Pavarësisht kërkimeve të saj, policia nuk ka mundur të gjejë ende kokën e prerë të viktimës, edhe pse i moshuari ka pohuar se të gjithë trupin e saj të prerë në pjesë e kishte hedhur në vendin ku grumbulloheshin mbetjet urbane në periferi të Korçës.

Trupi i masakruar dhe gjymtuar i 42-vjeçares u gjet pak para mesnatës të së premtes nga disa punonjës të pastrimit, në afërsi të fshatit të Ravonikut, tek pika e grumbullimit të mbeturinave. Viktimës i ishin prerë koka, këmbët dhe duart. Policia gjeti gjymtyrët e gruas në një qese, ndërsa trupin nudo larg tyre. Në një qese tjetër janë gjetur të paketuara rrobat e gruas, ndërkohë që ende nuk është gjetur koka e saj.