Parcelat e Lazaratit janë të tejmbushura me hashash

[EMAUS]

Parcelat e Lazaratit janë të tejmbushura me hashash

Kamerat e "Top Channel" zbulojnë kanabisin në oborre


Pavarësisht aksionit që u bë në Lazarat, ne kurrsesi nuk mund ta konsiderojmë Lazaratin të pastër. Kështu ka deklaruar ministri i Brendshëm, Bujar Nishani, dhe kjo deklaratë është e vërtetë. Lazarati, në çdo cep të tij është i mbushur me hashash në prag të korrjes përfundimtare. Të pakta janë familjet që nuk kanë kultivuar bimët narkotike në tokën e tyre. "Top Channel" ka hyrë në fshatin jugor, i cili çuditërisht po i reziston çdo aksioni policor. Qindra rrënjë kanabis janë mbjellë në oborre të rrethuara nga mure, apo qese plastmasi. Pavarësisht se uji në këtë fshat mungon, ai transportohet nga rruga nacionale dhe mbahet në fuçi të mëdha. Grupi i xhirimit të "Top Channel" hyri në Lazarat dhe e ka ndjekur kultivimin e kësaj bime narkotike që në fazën e fidanit. Gjatë operacionit të policisë, i koduar "Era e Malit", u korrën tetë mijë rrënjë, por nuk dihet numri i rrënjëve që për pak javë do të vilen e më pas do të trafikohen në linjën tradicionale, atë me Greqinë. Në krahasim me fshatrat e tjera, Lazarati vazhdon të jetë i gjelbër dhe era e rëndë e bimës narkotike ndihet pa hyrë mirë në fshat. Por, përveç një operacioni policor, të organizuar tri javë më parë, drejtuesit e rendit janë indiferentë, të paktën në ndalimin e furnizimit me ujë të boteve në rrugën nacionale. Nëse për Policinë e Shtetit është e vështirë të hyjë në këtë fshat për korrjen e qindra rrënjëve me kanabis, pyetja që ngrihet është: A funksionojnë sektorët përkatës për zbulimin e rrugëve nga transportohet kanabisi dhe si arrijnë këto ngarkesa të konsiderueshme të trafikohen nga një fshat pothuajse i izoluar?

Deklarata e ministrit

Ministri i Brendshëm pranoi dy ditë më parë se policia ka dështuar në tentativat e saj për të pastruar fshatin problematik nga bimët narkotike. "Lazarati nuk mund të cilësohet ende zonë e pastër nga lëndët narkotike", ka thënë Nishani në përgjigje të interesimit të mediave, pas analizës shtatëmujore të punës së dikasterit që ai drejton. Pak kohë më parë, policia kreu një operacion të gjerë në Kordhocë, lagjen e poshtme të fshatit Lazarat, por nuk u fut në brendësi të tij, aty ku janë edhe sasitë më të mëdha të drogës së mbjellë. Operacioni, në të cilin u angazhuan forca të shumta policie, u shoqërua me të shtëna që vinin nga fshati "rebel", por për fat të mirë nuk pati persona të lënduar. Ndërkaq, mediat kanë raportuar ditët e fundit se në brendësi të fshatit lënda narkotike ka nisur të korret dhe është në sasi shumë më të mëdha se vitet e kaluara. Burimet zyrtare të policisë konfirmuan ndërkohë se sasia e hashashit, që mbillet në Lazarat, zë një përqindje të konsiderueshme të sasisë së përgjithshme që mbillet në shkallë vendi. E nëse i ka mjaftuar vetëm një fjali për të pranuar dështimin në bastionin e kanabisit, ministri i Brendshëm ka bërë një paradë shifrash që paraqesin, sipas tij, arritjet e policisë në luftën kundër drogës. "Janë sekuestruar 47 kg heroinë, 813 gramë kokainë, 2277 kg hashash, si dhe janë asgjësuar në zona të ndryshme të vendit 80950 rrënjë kanabis", deklaroi Nishani. Sipas tij, gjatë shtatë muajve të këtij viti, krahasuar me të njëjtën periudhë të vitit të kaluar janë shënuar 8 operacione më shumë në luftën kundër drogës dhe janë arrestuar 15 autorë më shumë.

"Top Channel"



Harta


Asgjësimi i

lëndëve narkotike


- Në Qarkun e Shkodrës janë asgjësuar 45.110 rrënjë bimë narkotike kanabis

- Në Qarkun e Gjirokastrës janë asgjësuar 15.225 rrënjë bimë narkotike kanabis

- Në Qarkun e Vlorës janë asgjësuar 12.004 rrënjë bimë narkotike kanabis

- Në Qarkun e Kukësit janë asgjësuar 3.336 rrënjë bimë narkotike kanabis

- Në Qarkun e Durrësit janë asgjësuar 3.094 rrënjë bimë narkotike kanabis

- Në Qarkun e Beratit janë asgjësuar 1.219 rrënjë bimë narkotike kanabis

- Në Qarkun e Fierit janë asgjësuar 457 rrënjë bimë narkotike kanabis

- Në Qarkun e Korçës janë asgjësuar 452 rrënjë bimë narkotike kanabis

- Në Qarkun e Dibrës janë asgjësuar 53 rrënjë bimë narkotike kanabis