Rritet numri i viktimave të tërmetit

[aurel]

Më shumë se 36 orë pas tërmetit të fuqishëm që goditi ishullin indonezian të Sumatrës, punonjësit e shpëtimit ende vazhdojnë të llogarisin shkallën e shkatërrimeve.
Shefi i Kombeve të Bashkuara për operacionet humanitare, John Holmes tha se të paktën 1.100 vetë kishin humbur jetën, por zyrtarët besojnë se mund të gjenden edhe më shumë viktima.

Njerëzit ishin duke u kthyer nga puna për në shtëpi kur ndodhi tërmeti. Kjo gjë e bën edhe më të vështirë për autoritetet që të vlerësojnë se sa ka qenë numri i tyre.

Ndihma ka mbërritur në zonat e prekura më rëndë si qyteti Padang. Pjesa më e madhe e linjave telefonike nuk punojnë, gjithashtu ka edhe mungesë rryme. Me zonat e tjera të goditura nga tërmeti ka pasur shumë pak kontakt.

Ministri indonezian i Shëndetësisë ka bërë apel për më shumë ndihmë nga jashtë për operacionet e shpëtimit. Ministri Siti Fadilah Supari, tha nevojiteshin urgjentisht pajisje të specializuara për operacioniet e shpëtimit, pasi shumë viktima kanë mbetur nën rrënoja.