Folatet pengojnë paraqitjen e kancerit të zorrës

[aurel]

Pjesëmarrja e lartë e folateve (derivate të acidit folik) në ushqimin e grave mund të ulë dukshëm gjasat e tyre për të vuajtur nga kanceri i zorrës së trashë, bëjnë të ditur shkencëtarët jugkoreanë.
Në një hulumtim kanë marrë pjesë më shumë se 1100 persona të hulumtuar, ndërsa rezultatet janë publikuar në European Journal of Clinical Nutrition.

Ato kanë treguar se gratë të cilat kanë konsumuar më shumë folate me ushqim (më shumë se 270 mikrogram në ditë) kanë në përqindje 2/3 rrezik më të pakët të vuajnë nga kanceri i zorrës së trashë.

Acidi folik, i njohur edhe si vitamina B9, nuk ka ndikuar në zhvillimin e kancerit të zorrës te meshkujt.

Folatet janë të pranishme në perimet e gjelbra dhe agrumet, ndërsa organizmi i shfrytëzon ato për të ndërtuar nukleotide (pjesë përbërëse të ADN-së dhe ARN-së), për të kopjuar ADN-në dhe funksionet tjera të rëndësishme gjenetike.

Sipas hulumtuesve, ulja e konsumimit të folateve, rrit gjasat për paraqitjen e mutacioneve gjenetike.