HTC Incredible konkurrent i iPhone

[Kliton]

Në treg së shpejti do të gjendet edhe telefoni më i ri i mençur i kompanisë HTC i bazuar në sistemin operativ Android. Specifikat e tij flasin se bëhet fjalë për një telefon me performansa shumë të larta.
Në Shtetet e Bashkuara që një kohë po qarkullojnë thashetheme se Verizon, një prej rrjeteve më të mëdha të telefonisë mobile, së shpejti do të duhej të ketë në ofertë telefonin e ri të HTC-së me performansa të shkëlqyera. Emri i këtij telefoni të mençur është Incredible dhe duket se HTC e ka paramenduar atë si një konkurrent të fuqishëm të pajisjes së re iPhone e cila pritet nga të gjithë që të paraqitet në fund të muajit qershor.
Incredible do të ketë procesor Snapdragon të Qualcomm me takt prej 1 GHz dhe do të ketë deri në tetë gigabajt të memories interne e cila do të mund të zgjerohet me anë të kartelave të memories microSD deri në kapacitetin prej 32 gigabajt. Versioni i Androidit të instaluar do të duhej të jetë ai 2.1. Pritet që të ketë të integruar Flash dhe mbështetje për klientë të e-mailave me anë të Microsoft Exchange apo Google Mail.
HTC ka vendosur që në Incredible të integrojë fotoaparatin me rezolucion prej tetë megapikselash me dy dioda LED të cilat do të shërbejnë si blic gjatë fotografimit apo si ndriçim gjatë incizimit të video materialeve. Ekrani i tij me diagonale prej 3.7 inçësh do të jetë i bazuar në teknologjinë AMOLED dhe do të ketë 480 x 800 piksela.
Duket se Incredible do të jetë më i vogël dhe më i lehtë sesa pajisja aktuale iPhone. Dimensionet e tij do të duhej të ishin 117.5 x 58.5 x 11.9 mm, gjersa pesha 130 gramë.
Supozohet se Incredible do të mund të dilte në shitje gjatë fundit të këtij muaji, mirëpo çmimi nuk është bërë publik.

[ReniX]

Uroj te vij se shpejti dhe ne europe me ndonje çmim per te gjitha fashat!