Piu kafe me gruan, e masakron me thika

[URTESIA]

Piu kafe me gruan, e masakron me thika
SHKODËR -Kam vrarë gruan me thikë. Trupi i saj është në rrugën që të çon në Zogaj". Ky ka qenë deklarimi që ka bërë dje në mesditë në Drejtorinë e Policisë së Shkodrës 51-vjeçari Sami Bajraku, në momentin që ka zgjatur duart për pranga. Ndërsa ka bërë këtë deklarim, punonjësit e policisë i kanë bërë edhe disa pyetje të tjera, pasi sipas bluve ai po kalonte një gjendje të rëndë depresive. Një operacion shumë i shpejtë i policisë së Shkodrës ka bërë që të gjendet trupi i gruas mes ferrave në gjendje kome dhe të dërgohet në spital me shpresën e rikthimit në jetë. Sipas mjekëve, 47-vjeçarja Vjollca Bajraku ndodhet në gjendje të rëndë shëndetësore në Spitalin Rajonal të Shkodrës. Sipas deklarimeve të bashkëshortit shkak për këtë ngjarje të rëndë është xhelozia.
KRIMI
Paraditen e së dielës, çifti Bajraku ka dalë me makinë për të pirë kafe në një zonë jashtë qytetit. Rreth orë 11:00 të së dielës, kanë nisur të pinë kafen në një lokal buzë liqenit të Shkodrës, përkatësisht në Shirokë. Aty ka nisur debate, fillimisht me zë të ulët e më pas edhe me të bërtitura. Këtë e kanë pohuar dëshmitarët e shoqëruar për hetime në polici. Më pas, çifti ka dalë e ka vazhduar rrugën drejt 'Zogaj', aty ku dhe lëvizjet e njerëzve janë më të pakta. Në një vend të largët e pa njeri, Samiu dhe Vjollca kanë dalë nga makina dhe kanë vazhduar debatin. Ky ka qenë momenti kur burri ka goditur me thikë gruan e tij. Ai ka lënë viktimën në anë të rrugës, mbuluar me shkurre dhe është larguar. Ka hipur në makinë dhe ka shkuar direkt në Drejtorinë e Policisë së Shkodrës ku ka treguar dhe ngjarjen deri në detaje.
POLICIA
Burime nga Drejtoria e Policisë së Shkodrës pohojnë se Sami Bajraku, pasi është vetëdorëzuar e ka deklaruar krimin, është vënë në pranga për therjen me thikë të gruas së tij. Ai ka treguar vendin me përafërsi, ku dhe forcat e policisë nisën kërkimin.
Mësohet se shiu në formë rrebeshi dhe retë vështirësonin punën e bluve. Është dashur rreth 2 orë kontroll i imtësishëm që të gjendet gruaja. Të gjithë janë habitur kur kanë gjetur gruan ende gjallë, pasi burri kishte deklaruar vdekjen nga goditjet me thikë. "Gruaja kishte një plagë të rëndë në trup. Kishte pasur mjaft hemorragji. Në momentin kur e gjetëm, ajo mundi vetëm të na thotë se kishte ftohtë. Më pas ra në koma. E sollëm menjëherë në spital", - pohon për `GSH`një nga drejtuesit e policisë, pjesëmarrës në operacion. Burime nga Spitali Rajonal i Shkodrës sqarojnë se 47-vjeçarja është në gjendje shumë të rëndë.
HETIMET
Blutë e Shkodrës e nuk e kanë pasur të vështirë të bëjnë dokumentimin e ngjarjes pasi autori është vetëdorëzuar dhe ka treguar motivin e kësaj ngjarjeje. Sipas tij shkak është xhelozia që ai kishte për gruan e tij. Çifti Bajraku kishte 23 vite martesë, kishin dy fëmijë dhe jetonin në lagjen `Daniel Matlija` në qytetin e Shkodrës. Sipas komshinjve ato ishin njohur si një familje e qetë, pa probleme dhe respektoheshin nga të gjithë.
gazeta shqiptare